Հայ տուր-օպերատորները անհանգստացած են Եգիպտոսում Շարմ-էլ-Շեյխ հանգստավայրում շնաձկների հարձակումների մասին տեղեկություններով, որի արդյունքում նախօրեին գերմանացի մի զբոսաշրջուհի էր մահացել, իսկ դրանից մի քանի օր առաջ էլ 3 զբոսաշրջիկներ էին տուժել. Երկուսը` Ռուսաստանից, մեկը` Ուկրաինայից:
NEWS.am-ը որոշել է հարցում անցկացնել Հայաստանի զբոսաշրջային գործակալությունների շրջանում, պարզելու, թե արդյոք հայ զբոսաշրջիկները նո՞ւյնպես զանգվածաբար վերադարձնում են տուրիստական ուղեգրերը, ինչպես դա, ըստ մամուլի հրապարակումների, տեղի է ունենում Ռուսաստանում եւ Եվրոպական երկրներում:
Գրեթե բոլոր տուր-օպերատորները հայտարարեցին, որ մինչեւ Նոր տարի իրենք սպասվում է Եգիպտոս այցելողների մեծ հոսք, սակայն եթե իրավիճակը շարունակի բարդանալ, դա, հաստատ կազդի այդ ուղղությամբ ուղեգրերի պահանջարկի վրա: Ինչպես հայտնի է, հայերը վաղուց է, ինչ այցելում են Եգիպտոսի ծովափերը, հատկապես, նրանք այնեղ են ձգտում Նոր տարուն, երբ Հայաստանում շատ ցուրտ է:
Հիշեցնենք, որ վերջին ժամանակներս Շարմ-էլ-Շեյխում արձանագրվել է միանգամից մի քանի դեպք, երբ շնաձուկը ջրում հարձակվել է հանգստացողների վրա: Տուժածների թվում են երեք ռուսներ, ովքեր գտնվում են Եգիպտոսի մայրաքաղաք Կահիրեի հիվանդանոցում բազմաթիվ կտրված վերքերով եւ անգամ վերջույթների հատմամբ: Ավելի ուշ, դեկտեմբերի 5-ին Շարմ-էլ-Շեյխի Նաամա-Բեյ ծովախորշում շնաձկան հարձակումից մահացել է գերմանացի 70-ամյա մի կին:
Այդ հատվածում ծովափերը մինչեւ հիմա փակ են եւ փակ կմնան այնքան, մինչեւ վերջնականապես չվերանա շնաձկների հարձակման վտանգը: