Երեւանի նախկին քաղաքապետ Գագիկ Բեգլարյանին քրեական հետապնդման ենթարկելու լուրերն անտեղի են: Այդ մասին դեկտեմբերի 16-ին կայացած մամուլի ասուլիսում հայտարարել է Հանրապետական կուսակցության խմբակցության ղեկավար Գալուստ Սահակյանը:
Նա կարծիք է հայտնել, որ Բեգլարյանը կարեւոր քաղաքական որոշում է կայացրել՝ հրաժարական տալով, ուստի այժմ անտեղի է քրեական հետապնդման մասին խոսելը. «Քաղաքական որոշումները քրեական գործընթացներից ավելի կարեւոր են: Բեգլարյանի հրաժարականի հարցը քննարկվել է նախագահի աշխատակազմում, եւ որեւէ ճնշում չի եղել»:
Մեկնաբանելով իր կուսակից Ռաֆիկ Պետրոսյանի հայտարարությունը՝ Բեգլարյանի դեմ քրեական գործ հարուցելու անհրաժեշտության մասին, Սահակյանը հայտարարել է թե ՀՀԿ-ն մեծ կուսակցություն է եւ նրա շարքերում կլինեն մարդիկ, որոնք «ապուշություններ են ասում»:
Ինչպես ավելի վաղ հայտնել էր NEWS.am-ը, Երեւանի նախկին քաղաքապետ Գագիկ Բեգլարյանը ստիպված էր հրաժարական տալ զբաղեցրած պաշտոնից, երբ ծեծի էր ենթարկել նախագահի աշխատակազմի արարողակարգի բաժնի աշխատակից Արամ Կանդայանին: