Միացյալ Նահանգների Կոնգրեսի Ներկայացուցիչների պալատը կարող է հաջորդ շաբաթ քվեարկել Հայոց ցեղասպանությունը ճանաչող բանաձեւի նախագիծը: Այդ մասին հայտնում է Associated Press լրատվական գործակալությունը:
Վկայակոչելով Պալատի աշխատակազմի ներկայացուցիչներին, որոնք չեն ցանկացել հրապարակել իրենց անունը, քանի որ լիազորված չեն մեկնաբանություններ անելու համար, AP-ն տեղեկացնում է, որ ուրբաթ օրը Դեմոկրատական կուսակցության խմբակցության առաջնորդները հնարավոր քվեարկության հարցը քննարկել են օրենսդիրների հետ: Պալատի ներկայիս խոսնակ Նենսի Փելոսիի գրասենյակից մեկնաբանություն ստանալ գործակալությանը առայժմ չի հաջողվել:
Գործակալությունը նկատում է, որ նման քվեարկությունը հարված կինի նախագահ Բարաք Օբամային իր կուսակիցների կողմից, քանի որ բանաձեւը կարող է վնասել կարեւոր դաշնակից Թուրքիայի հետ Միացյալ Նահանգների հարաբերությունները:
«Ազատություն» ռադիոկայանի փոխանցմամբ, Ներկայացուցիչների պալատի դեմոկրատական խմբակցության առաջնորդները տեւական ժամանակ քննարկումից դուրս են թողել նախագիծը, եւ այն կարող է առհասարակ ուժը կորցնել եկող ամիս, երբ Պալատի վերահսկողությունը կստանձնեն հանրապետականները:
Նշենք, որ երեկ հայտնի էր դարձել, որ ԱՄՆ Կոնգրեսի Ներկայացուցիչների պալատի խոսնակ Նենսի Փելոսին մտադիր է Հայոց ցեղասպանության թիվ 252 բանաձեւը առաջիկայում դնել քվեարկության:
Ինչպես արդեն հայտնել է NEWS.am-ը, այս տարվա մարտի 4-ին ԱՄՆ Կոնգրեսի Ներկայացուցիչների պալատի Արտաքին հարաբերությունների հանձնաժողովը 23 «կողմ», 22 «դեմ» ձայներով ընդունել էր Հայոց ցեղասպանության վերաբերյալ թիվ 252 բանաձեւը։