ԱՄՆ 9-րդ օկրուգի դատարանը վերանայելու է իր իսկ ընդունած որոշումը՝ ցեղասպանվածների ժառանգների կողմից ներկայացված հայցերի մերժման վերաբերյալ, ինչն աննախադեպ երեւույթ է: Այսօր՝ դեկտեմբերի 20-ին լրագրողների հետ հանդիպման ժամանակ նշեց թուրքագետ Անուշ Հովհաննիսյանը: Նրա ներկայացմամբ՝ դեռ 2009-ին ամերիկյան նշյալ դատարանի կողմից մերժվում էր Ցեղասպանություն վերապրածների՝ ապահովագրական ընկերությունների դեմ ներկայացված հայցերի ընդունումը:
Դեկտեմբերի 10-ին նույն դատավարական կազմով, սակայն որոշակի փաստերի ազդեցության ներքո՝ դատարանը փոխեց իր որոշումը՝ չեղյալ համարելով 2009-ի իր որոշումը:
«Թուրքիան անհանգստացած է. հայերին հաջողվեց բեկանել նախկին դատական որոշումը, ինչը լավ ազդակ է այսուհետ շարունակաբար հայցեր ներկայացնելու համար»,-կարծիք հայտնեց Ա. Հովհաննիսյանը:
«Սակայն վատն այն է, որ մինչեւ օրս չունենք Ցեղասպանության ընթացքում մարդկային ու նյութական կորուստների մասին ստույգ տեղեկագրքեր: Մասնակի կալվածագրքեր կան, տարածքային հատվածական տեղեկատուներ կան, բայց այդ ամենը միասին, ընդհանարական՝ չունենք», թեման շարունակեց պատմաբան Էդգար Հովհաննիսյանը: Նրա ներկայացմամբ՝ բավականին ստույգ տվյալներ ներկայացված են Կարսի մազում կորստյան մատնված հայերի նյութական գույքի մասին: Ժամանակին Հովհաննես Թումանյանը եւս զբաղվել է նման ցուցակների հավաքագրմամբ:
Ինչպես նշեց Է. Հովհաննիսյանը, հայերը լավ հնարավորություն ունեն ամերիկյան դատարանների միջոցով վերադարձնել իրենց նախնիների կորուստները: «ԱՄՆ-ն ժողովրդավարական պետություն է, ու վերջինիս դատարանների միջոցով հնարավոր է Թուրքիային պահանջներ ներկայացնել ու նյութական փոխահատուցումների ռեալ ակնկալիքներ ունենալ»,-հավելեց պատմաբանը: