ԱՄՆ-ում Թուրքիայի դեսպան Նամըք Թանը կազմակերպված մամուլի ասուլիսի ընթացքում անդրադարձել է ԱՄՆ Կոնգրեսում Հայոց ցեղասպանությունը դատապարտող բանաձեւի տապալմանը եւ այդ ուղղությամբ հետագա զարգացումներին։
Թուրքական CNNturk-ի փոխանցմամբ՝ Նամըք Թանը նշել է, թե վերջին օրերին թուրքական հասարակությունը հայկական նախագծի դեմ հանդես եկավ աննախադեպ ակտիվությամբ, որը շատ է ուրախացրել թուրքական իշխանություններին։ «Թիվ 252 բանաձեւի տապալմամբ մեր անելիքները չեն վերջանում։ Մենք հասկանում ենք, որ նման նախագծեր կրկին կհայտնվեն ԱՄՆ Կոնգրեսում եւ դրանց դեմ պետք է ավելի վճռական եւ միասնական պայքարենք»,-շեշտել է Թանը։
Հարցին, թե ի՞նչ միջոցներ են ձեռնարկվել հայկական բանաձեւն օրակարգ չներառելու համար, Նամըք Թանը պատասխանել է, թե իրենք զանգահարել են բոլոր կոնգրեսականներին՝ ուշադրություն չդարձնելով՝ նրանք հանրապետակա՞ն են, թե՞ դեմոկրատ։ «Հիմա էլ զանգում եւ շնորհակալություն ենք հայտնում բոլոր կոնգրեսականներին։ Ինձ չի հաջողվել միայն Նենսի Փելոսիի հետ ուղիղ կապ հաստատել»,-նշել է թուրք դեսպանը։