Նոր տարին նոր հույսերի ու սպասելիքների, երազանքների ու ցանկությունների շրջան է։ Այս տոնին անհամբերությամբ սպասում են բոլորը՝ մեծերն ու փոքրերը՝ հույսով, որ գալիք տարին ավելի լավն ու բարի է լինելու, քան՝ նախորդը։ Իհարկե, միշտ չէ, որ մարդկանց սպասումներն արդարանում են. ոմանց հանդեպ Նոր տարին այնքան էլ բարեհաճ չի գտնվում, ոմանց հանդեպ՝ հակառակը։ Ոմանք դժգոհ են մնում նրանից, ոմանք՝ գոհ։
Ինչեւէ, ավարտվեց նաեւ այս՝ 2010 թվականը։ Բարի՞ էր Վագրի տարին, թե՝ ոչ, յուրաքանչյուրը կարող է դատել իր մասով։
Իսկ թե Հայաստանի եւ հայ ժողովրդի համար ինչպիսին կլինի 2011-ը , NEWS.am-ի թղթակիցը փորձեց պարզել աստղագետ, մաթեմատիկոս Էլյա Հովհաննիսյանից։
Աստղագետի խոսքով, նապաստակի տարին (հայկական տոնացույցով՝ Երկվորյակի) աշխատանքի եւ ծանրաբեռնվածության տարի է լինելու։ «Այս տարի հաջողությունը հենց այնպես, հեշտ չի գա։ Հայաստանի համար 2011-ը աշխատանքի դժվար ժամանակ կլինի։ Ապագայի հզոր շահերի համար անհրաժեշտ կլինի ավելի շատ աշխատել։ Իհարկե, Նոր տարում կլինեն մի շարք երեւույթներ,որոնց մասին ես հիմա չեմ ուզում խոսել, բայց կարող եմ ասել, որ Հայաստանի համար ամեն ինչ շատ լավ է լինելու մինչեւ 2016 թվականը։ Դրանից հետո աստիճանական անկում կլինի։ Լուսավոր ու պայծառ երեւույթներ էլ կլինեն, բայց դա շատ անհատական է՝ ոմանց համար։ Աներկյուղ եւ ավելի հեշտ կյանք կունենան հատկապես Նապաստակի կամ Երկվորյակի տարում ծնվածները»,- ամփոփեց Էլյա Հովհաննիսյանը։