Մինչ տեղեկատվական տեխնոլոգիաների ոլորտի փորձագետները նշում են, որ Հայաստանը բավականաչափ քայլեր չի ձփեռնարկում ՏՏ-ն զարգացնելու համար, վարչապետ Տիգրան Սարգսյանը այսօր՝ դեկտեմբերի 30-ի կառավարության նիստում հայտարարեց, որ ՏՏ ոլորտում 2010-ին ունեցել ենք նշանակալի հաջողություններ։ Այսպես, ըստ վարչապետի, 3G ծածկույթով ծածկվել է ողջ երկիրը, եւ առաջին անգամ գործարկվել է 4 G ծածկույթը. «ԱՊՀ երկրներում այդ առումով առաջինն ենք, ու մտնում ենք աշխարհում առաջին տասնյակի մեջ»։

Մյուս կարեւոր ձեռքբերումը, ըստ վարչապետի, ինտերնետի սակագներն են։ Արագագործ ինտերնետի մանրածախ սակագինը 15 հազ. դրամից իջել է մինչեւ 8 հազ. դրամ՝ 1 մեգաբիթի համար։ Երկու անգամ ավելացել են ինտերնետ օգտագործողները։ Մոտ 173 հազ. մարդ Հայաստանում համարվում է ինտերնետ սպառող, իսկ եթե հաշվի առնենք նաեւ բջջային հեռախոսներից միացողներին՝ այդ թիվը հասնում է մինչեւ 1,5 մլն մարդու։ Ստացվում ՝ Հայաստանի գրեթե յուրաքանչյուր երկրորդ քաղաքացի ունի ինտերնետ հասանելիություն։ Մոտ կրկնակի նվազել են նաեւ ինտերնետի մեծածախ սակագները։

Այդ ամենի շնորհիվ, ըստ վարչապետի, 2011 թ. ավելի բարերար միջավայր կստեղծվի ՏՏ ոլորտի զարգացման համար, որը կառավարության գերակա ուղղություններից է։