Լիտվայի նախագահ Դալյա Գրիբաուսկայտեն մայիսին կայցելի Ադրբեջան:
«Մեր նախագահն իր օրակարգում ընդգրկել է Ադրբեջան այցը, որպեսզի ավելի խորը ծանոթանա եւ ուղիներ փնտրի Լեռնային Ղարաբաղի գործընթացի կարգավորման համար»,- APA-ին հայտնել է Ադրբեջանում Լիտվայի դեսպան Կեստուտիս Կուջմինասը:
Մարտի սկզբին Հայաստան, Ադրբեջան եւ Վրաստան կայցելի ԵԱՀԿ գործող նախագահ, Լիտվայի արտգործնախարար Աուդրնոյուս Աժուբալիսը:
Ինչպես ավելի վաղ հայտնել էր NEWS.am-ը, Գեդրյուս Չեկուոլիսը 2010 թվականի դեկտեմբերին հայտարարել էր, որ Լիտվան ԵԱՀԿ-ում նախագահելու ընթացքում դժվար թե ձգձգված հակամարտությունների լուծման ճանապարհին հեղափոխություն սադրի, սակայն կաշխատի բոլոր ուղղություններով, որպեսզի դրական արդյունքների հասնի։
«Ես կասկածում եմ, որ մեզ կհաջողվի հեղաշրջում իրականացնել ձգված հակամարտությունների լուծման ուղղությամբ, քանի որ ԵԱՀԿ-ն կազմակերպություն է, որում առաջընթացը չափվում է միլիմետրերով։ Սակայն ամեն նվաճված միլիմետրը ոսկու քաշ ունի»,- հայտարարել է Չեկուոլիսը։
2010 թվականին ԵԱՀԿ-ում նախագահում էր Ղազախստանը։ 2011 թվականին Ղազախստանին փոխարինել է Լիտվան, 2012-ին այդ պարտականությունը կստանձնի Իռլանդիան, իսկ 2013-ին՝ Ուկրաինան: