Ազգային Ժողովի «Ժառանգություն» խմբակցությունը պատրաստվում է Հայաստան ժամանող ԵԽ մարդու իրավունքների հանձնակատար Թոմաս Համարբերգի հետ հանդիպմանը եւ այդ հանդիպման ժամանակ բարձրացնելու է Հայաստանի ժողովրդավարական վիճակին վերաբերող մի շարք հարցեր:
Այս մասին NEWS.am-ի թղթակցին հայտնեց «Ժառանգություն» խմբակցության անդամ, ԵԽԽՎ-ում Հայաստանի պատվիրակության անդամ Զարուհի Փոստանջյանը: Նա նշեց, որ հանդիպման ընթացքում հիմնական շեշտադրումը լինելու է մարտի 1-ի դեպքերի չբացահայտված լինելը:«Անդրադառնալու ենք մարտի 1-ի դեպքերի չբացահայտված լինելուն, քաղաքական հայացքների համար բանտերում գտնվող անձանց իրավունքներին, մարտի 1-ի դեպքերի ժամանակ բանակի օգտագործման փաստին, ինչպես նաեւ հայկական որոշ հեռուստաընկերությունների թվային հեռարձակման լիցենզիայից զրկելուն:
Մասնավորապես «Ա1+»-ին»,- հայտարարեց Փոստանջյանը: Նա հավելեց նաեւ, որ անդրադարձ է լինելու նաեւ Ընտրական օրենսդրության փոփոխություններին: «Մենք նշելու ենք, որ եթե այս խնդիրները չլուծվեն, ապա եկող ընտրությունների ժամանակ ապահովագրված չենք լինելու մարտի մեկերի կրկնությունից, ընդ որում՝ ավելի վատ սցենարներով»,- նշեց պատգամավորը:
Հարցին, թե ինչ ակնկալիք ունեն Համարբերգի այցից, NEWS.am-ի զրուցակիցը պատասխանեց. «Մարդու իրավուքների հանձնակատարը հենց այնպես չէ, որ գալիս է Հայաստան: Նա գալիս է, որպեսզի զեկույց պատրաստի Հայաստանում հետմարտիմեկյան իրավիճակի վերացման եւ ժողովրդավարության մակարդակի մասին: Այդ զեկույցը հիման վրա են ԵԽ Խորհրդարանական վեհաժողովն ու Նախարարների կոմիտեն վերաբերմունք արտահայտելու Հայաստանի նկատմամբ»:
Փոստանջյանի խոսքով՝ իրենց նպատակը մեկն է՝ Հայաստանում տիրող ժողովրդավարության իրավիճակի մասին օբյեկտիվ տեղեկություն ներկայացնել Մարդու իրավունքների հանձնակատարին, որպեսզի վերջինս միջոցներ ձեռնարկի՝ վերացնելու մարտի 1-ի հետեւանքները եւ կանխի ապագայում մարդու իրավունքների զանգվածային խախտումները Հայաստանում:
Նշենք, որ Թոմաս Համարբերգը Հայաստան է ժամանելու հունվարի 18-ին: Նա հանդիպելու է նաեւ Հայաստանի նախագահ Սերժ Սարգսյանի եւ Հայ ազգային կոնգրեսի առաջնորդ Լեւոն Տեր-Պետրոսյանի հետ:
