Վրաստանում եւս երկու հղի կանանց մոտ հաստատվել է H1N1 վիրուսով («խոզի գրիպ») հիվանդ լինելու ախտորոշումը: Այս մասին հաղորդել են Վրաստանի հիվանդությունների վերահսկողության եւ հասարակական առողջության ազգային կենտրոնից: Այսպիսով, «խոզի գրիպով» վարակվածները ընդհանուր թիվը Վրաստանում հասել է 16-ի, հաղորդում է «Նովոստի Գռուզիան»:
Հունվարի 19-ի առավոտյան Թբիլիսիի Գուդուշաուրիի անվան հիվանդանոց է տեղափոխվել 18-ամյա հղի մի կին՝ վարակված H1N1 վիրուսով:Բժիշկների խոսքով, հիվանդի վիճակը կայուն է:
Ներկայումս Վրաստանի հիվանդությունների վերահսկողության եւ հասարակական առողջության ազգային կենտրոնի կողմից արձանագրվել է երեք դեպք, երբ տվյալ հիվանդությունը հանգեցրել է մահվան՝ բժիշկներին ուշ դիմելու հետեւանքով:
2009 թվականի հուլիսից մինչեւ 2010-ի նոյեմբեր ընկած ժամանակահատվածում Վրաստանում «խոզի գրպից» մահացել է 31 մարդ, իսկ հիվանդների ընդհանուր թիվը կազմում է 1 279 մարդ: