Հայկական ընկերությունները վրացական բրենդների օգտագործման կարիքը չունեն, քանի որ հայկական բրենդները շատ լավ ճանաչում ունեն Ռուսաստանում: Այսօր՝ հունվարի 21-ին լրագրողների խնդրանքով անդրադառնալով հայ-վրացական «բրենդային պատերազմին», նման տեսակետ հայտնեց Հայրենական արտադրողների միության նախագահ Վազգեն Սաֆարյանը, հավելելով, որ ռուսական շուկան փակված է վրացական գինիների համար եւ հայկական գինիները կարող են զբաղեցնել այդ շուկան:
Հիշեցնենք, որ վրացական կողմը մեղադրանքներ էր ներկայացրել Հայաստանի հասցեին, ըստ որի՝ եվրոպական եւ ռուսական շուկաներում վրացական բրենդները ներկայացվում են որպես հայկական։ Սաֆարյանը բրենդները գողանալու մեղադրանքները որակեց որպես վրացիների կողմից սարքված քաղաքական շոու։
Նրա կարծիքով՝ հայաստանցիները սկսել են ավելի շատ գինի խմել, ինչն ավելի է մեծացնում հայկական գինիների նկատմամբ հետաքրքրությունը արտասահմանում։
Սակայն, ըստ Վ. Սաֆարյանի, հայկական բրենդները ճիշտ տեսակավորման կարիք ունեն։ Օրինակ՝ «արենի» սորտի խաղողներ աճեցվում են հանրապետության տարբեր շրջաններում, սակայն դրանք ամեն տեղ նույն որակը չունեն։ Վայոց Ձորի մարզում «արենի» սորտի խաղողը մթերվում է կգ-ը 200 դրամով, իսկ Արարատյան դաշտում՝ 80 դրամով; Սակայն 2 դեպքում էլ «Արենի» գինին վաճառվում է նույն գնով։
Այդ հակասությունները վերացնելու համար կառավարությունը որոշել է պարտավորեցնել գինի արտադրողներին՝ շշի վրա նշել նաեւ այն գյուղի անունը, որտեղ աճեցվել է խաղողը։