Մոսկվայի «Դոմոդեդովո» օդանավակայանում տեղի ունեցած ահաբեկչությունը վրդովմունք է առաջացրել եւ խորապես ցնցել բոլորիս: Այս մասին «Էխո Մոսկվի» ռադիոկայանին տված հարցազրույցում ասել է Հայաստանի նախագահ Սերժ Սարգսյանը, հայտնելով իր ցավակցությունները զոհերի հարազատներին եւ Ռուսաստանի ղեկավարությանը:
«Ասել, որ ինձ համար անընդունելի են նման քայլերը, նշանակում է ոչինչ չասել: Վստահ եմ, որ շատ շուտով Ռուսաստանի համապատասխան մարմինները կբացահայտեն եւ կպատժեն մեղավորներին: Իհարկե, ամեն մի նման դեպք ծանր է յուրաքանչյուր երկրի համար: Ռուսաստանի համար, կարծում եմ, վերջին 10-15 տարիներին այդ դեպքերը շատ ցավագին են: Ռուսաստանի ղեկավարության, պետական մարմինների կողմից ձեռնարկվող գործողությունները, որոնք ուղղված են նման դեպքերն արմատախիլ անելուն, կարծում եմ, էլ ավելի ակտիվորեն կշարունակվեն»,- ասել է ՀՀ նախագահը:
Ավելի վաղ NEWS.am-ը հայտնել էր, որ Մոսկվայի «Դոմոդեդովո» օդանավակայանի միջազգային տերմինալի ժամանման սրահում, հունվարի 24-ին Երեւանի ժամանակով 17։ 40-ին պայթյուն է որոտացել։ Պայթյունի կապակցությամբ, քրեական գործ է հարուցվել 4 հոդվածներով. «ահաբեկչություն», «երկու եւ ավելի մարդկանց սպանություն», «զենքի եւ պայթուցիկ նյութերի անօրինական շրջանառություն» եւ « զենքի եւ պայթուցիկ նյութերի պատրաստում»:
