Հայկական կողմը միշտ տիրապետում է իրավիճակին առաջին գծում եւ պատրաստ է յուրաքանչյուր ոտնձգության արձագանքելու: Այսօր՝ հունվարի 28-ին «Եռաբլուրում» լրագրողների հետ զրույցի ժամանակ հայտարարել է Հայաստանի պաշտպանության նախարար Սեյրան Օհանյանը:
«Այսօր առաջին գծում հարաբերական խաղաղություն է տիրում, բայց, ինչպես գիտեք, 1994 թվականից այս կողմ մերթընդմերթ խախտումներ են տեղի ունենում` կրակոցներ, դիպուկահարների կրակներ: 2010 թվականի վերջին` Աստանայի կոնֆերանսի նախօրեին եւ դրանից հետո կրակոցները, լարվածությունը, կարծես թե, իջել էր: Այսօր լարվածությունը նորից մի թեթեւ զարգացում է ապրում, բայց հայկական կողմը միշտ պատրաստ է յուրաքանչյուր ոտնձգության արձագանքելու: Այսօր էլ ես ասում եմ, որ առաջին գծում մենք իրավիճակին միշտ տիրապետում ենք, եւ ցանկացած խախտման Հայոց բանակի բոլոր ստորաբաժանումները ի վիճակի են արժանի պատասխան տալ»,-ասել է նա:
Պաշտպանության նախարարը տեղեկացրել է, որ 2011-ը Հայաստանի Զինված ուժերի համար հայտարարվել է որակական առաջընթացի եւ մարտական վարպետության բարձրացման տարի, իսկ տարվա առաջին կիսամյակը` «կարգապահության ամրապընդման կիսամյակ»: Նրա խոսքով, Հայոց բանակը պատրաստ է արժանի պատասխան տալ ոչ միայն սահմանին հնչող կրակոցներին, այլեւ «այն բոլոր ռազմատենչ հայտարարություններին, որոնք իրականացնում են մեր արեւելյան հարեւանները` առանց հասկանալու, որ այն, ինչի մասին խոսում են, մենք դա մեկ անգամ արդեն տեսել ենք եւ պատվով ենք դուրս եկել»:
«Քանակությունը չէ, որ, ընդհանուր առմամբ, որոշում է բանակների մարտունակության աստիճանը: Մենք պատրաստությամբ, որակական հատկանիշներով եւ մանավանդ մեր զինվորների մարտական ոգով ավելի բարձր ենք եւ մենք մեր երկիրը պատվով պաշտպանելու ենք»,- վստահություն է հայտնել նախարարը:
Նա անդրադարձել է նաեւ բանակում առկա խնդիրներին, նշելով. «Մենք այսօր ձեռքբերումներ ունենալուց ուրախանում ենք իհարկե, բայց գլխակորույս չենք հրապուրվում: Խոսք ենք տվել, որ դափնիների վրա չնիրհենք, այլ ընդհակառակը` ավելի լուրջ մտածենք մեր թերությունների, բացթողումների վրա»:
Ինչ վերաբերում է Զինված ուժերի ղեկավարության մեջ կադրային հնարավոր փոփոխություններին, Օհանյանն ասել է, թե դեմ է կտրուկ մասշտաբային փոփոխություններին: «Այն սպաները, նաեւ բարձրաստիճան, որոնք այսօր իրենց պարտականությունների կատարմամբ մտնել այն պահանջներին, որ դրված են մեր առջեւ եւ Պաշտպանության նախարարության պահանջներին, նրանք մեր հետ ծառայելու են եւ աշխատելու են մշտապես: Որոնք որ թերանում են, մենք դրանց համար իրենց հնարավորությունների սահմաններում տեղ գտնում ենք»,- ասել է նա: