ԵԽԽՎ-ում Հայաստանի պատվիրակությունը դեռեւս չի որոշել, արդյոք մասնակցելո՞ւ Լեռնային Ղարաբաղի հարցով ԵԽԽՎ ժամանակավոր ենթահանձնաժողովի աշխատանքներին: Այս մասին լրագրողների հետ հանդիպման ժամանակ փետրվարի 1-ին հայտարարեց ԵԽԽՎ-ում ՀՀ պատվիրակության ղեկավար Դավիթ Հարությունյանը: Նա եւ պատվիրակության անդամներից ԲՀԿ-ն ներկայացնող Նաիրա Զոհրաբյանն ու ՀՀԿ-ն ներկայացնող Արմեն մելիքյանը ամփոփում էին ԵԽԽՎ ձմեռային նստաշրջանի աշխատանքները:
Դավիթ Հարությունյանը նշեց, որ 2005 թվականին ընդունված 1416 բանաձեւի հիման վրա գործող ենթահանձնաժողովի ստեղծման պատմությունը, նշելով, որ այն անարդյունավետ կառույց է, քանի որ ի չիք է դարձնելու անցյալ տարիների ընթացքում ԼՂ խնդրի կարգավորման գործընթացում արձանագրված առաջընթացը եւ ձախողելու է ԼՂ խնդրի խաղաղ կարգավորումը: Դավիթ Հարությունյանի խոսքով՝ ԵԽ օրակարգում մշտապես եղել է այդ բանաձեւը, եւ հայկական պատվիրակությունը այս ընթացքում մշտապես ջանքեր է գործադրել՝ ենթահանձնաժողովի աշխատանքների վերսկսումը բացառելու ուղղությամբ: իսկ երբ ԵԽԽՎ նախագահ ընտրվեց թուրք պատվիրակ Մեվլութ Չավուշօղլուն, նա միջոցներ ձեռնարկեց ենթահանձնաժողովը վերակենդանացնելու ուղղությամբ:
Դավիթ Հարությունյանի խոսքով՝ ենթահանձնաժողովը հարթակ է դառնալու միմյանց փոխադարձ մեղադրանքներ ուղղելու համար: «Մեր մտահոգությունն է, որ հայ-ադրբեջանական հարաբերությունները բերենք խաղաղ եւ կառուցողական դաշտ, մինչդեռ ենթահանձնաժողովը բացառում է նման հեռանկարի գոյությունը»,-հայտարարեց նա:
ԵԽԽՎ-ում ՀՀ պատվիրակության ղեկավարը հավելեց նաեւ, որ ենթահանձնաժողովի աշխատանքներին մասնակցելու վերաբերյալ իր դիրքորոշումը դեռեւս չի հստակեցրել, սակայն այս պահի դրությամբ ամենաօպտիմալ որոշումը համարում է դրա աշխատանքների սառեցումը մինչեւ որեւէ այլ կողջամիտ ելք գտնվի: «ԼՂ խնդրի կարգավորմանը վնասող որեւէ կառույցի աշխատանքների մենք չենք մասնակցելու»,-հայտարարեց Հարությունյանը:
Իսկ ԵԽԽՎ-ում հայկական պատվիրակության անդամ ԲՀԿ-ական Նաիրա Զոհրաբյանը NEWS.am-ի թղթակցին հայտնեց, որ եթե այդ ենթահանձնաժողովի աշխատանքները վերսկսվեն եւ պատվիրակությունները մասնակցեն, ապա «դա կվերածվի ձեռնամարտի հարթակի եւ ռմբահարումներն անխուսափելի կլինեն»:
Հիշեցնենք, որ ԵԽ բյուրոյի որոշմամբ՝ Լեռնային Ղարաբաղի հարցով ենթահանձնաժողովի նախագահ է ընտրվել Իսպանիայի ներկայացուցիչ, կատալոնացի Խուգլա ի Կոստան, ով Դեմոկրատների եւ Լիբերալների ալյանսի խմբակցության անդամ է: Նրա հետ, սակայն, ինչպես նշեց պատվիրակության ԲՀԿ-ական անդամ Նաիրա Զոհրաբյանը, հայկական պատվիրակության անդամները մինչեւ այժմ չեն հանդիպել, եւ նրա անկողմնակալությունը ստոգող հարցեր նրան չեն տվել: