«Տրոյկա Դիալոգ» ընկերության ղեկավար, Հայաստանի Ազգային մրցունակության հիմնադրամի հոգաբարձուների խորհրդի անդամ Ռուբեն Վարդանյանը «Ֆինանս» պարբերականին տված հարցազրույցում հայտարարել է, թե պաշտոնից չի հեռանա, մինչեւ չհավաստիանա, որ իր գործը կարող է հանձնել ինչ-որ մեկին:
Հարցին, թե ինչպե՞ս է վարվելու գումարների հետ, որոնք ստացվելու են «Տրոյկան» վաճառելուց հետո, Վարդանյանը պատասխանել է, թե չի մտածել այդ ուղղությամբ, քանի որ տարբեր այլ նախագծեր ունի:
«Եթե ես հեռանալու լինեմ, կհեռանամ, ինչո՞ւ վաճառել բիզնեսը, որպեսզի նորից բանկի՞ր դառնամ: Թեեւ եթե հիմա ես ձեզ դա ասեմ, ապա դուք 2012-ին կհիշեցնեք ինձ, ասելով. «Ռուբեն, հարցազրույցում ինձ ասել եք, որ հեռանալու եք, իսկ դուք չեք հեռանում»,- ասել է Վարդանյանն ի պատասխան հարցի, թե կմնա՞ բիզնեսում «Տրոյկան» վաճառելուց հետո: Նրա խոսքով, 2008-ից ի վեր, երբ ինքը հայտարարեց, որ վաճառելու է անգամ ընկերության սահմանափակման իրավունք տվող փաթեթը, շատ բան է փոխվել:
«Փոխվել է ֆինանսական աշխարհը, փոխվել է աշխարհը: Կառավարումը խստացել է, մրցակցությունը այլ է: Պետությունն ամբողջ աշխարհում ավելի մեծ դեր է սկսել խաղալ ներդրումային բիզնեսում, հայտնվել են անհասկանալի կոմերցիոն կառույցներ, դաշտից դուրս են մղվել շատ խաղացողներ»,- ասել է Ռ. Վարդանյանը:
Վարդանյանի խոսքով, ընկերությունում իմացել են նման տարբերակի մասին. «Ես նրանց ասել եմ, որ 2012-ից փոխելու եմ մասնագիտությունս»,- ասել է նա:
