ԵԽԽՎ-ում Ղարաբաղի հարցով ենթահանձնաժողովի ստեղծումը կարելի է համարել այդ կառույցի նախագահ Մեվլութ Չավուշօղլուի հաղթանակը։ Փետրվարի 3-ին տեղի ունեցած մամուլի ասուլիսի ժամանակ նման տեսակետ հայտնեց թուրքագետ Արտակ Շաքարյանը:
Նրա խոսքով, եթե ԵԽԽՎ-ում Հայաստանի պատվիրակությունը բոյկոտն օգնի, որ այդ ենթահանձնաժողովը ցրվի, ապա շատ լավ կլինի, բայց եթե Ղարաբաղի հարցով ենթահանձնաժողովը շարունակի իր գործունեությունը, ապա մենք, ուզած, թե՝ չուզած, պետք է մտնենք այդ խաղի մեջ:
Պատասխանելով NEWS.am-ի հարցին, թե Չավուշօղլուի այս հաղթնակը եւ թուրք-ադրբեջանական տանդեմի ուժեղացումը կարող են նպաստել ղարաբաղյան խնդրի կարգավորման հարցը ԵԱՀԿ Մինսկի խմբի ձեւաչափից դուրս բերելուն եւ այլ ձեւաչափով իրականացնելուն, Շաքարյանն ասաց. «Կարծում եմ, նման բան հնարավոր չէ։ ԵԱՀԿ համանախագահող երկրները կանեն ամեն բան, որպեսզի Թուրքիան, Չավուշօղլուի ջանքերով, մուտք չգործի եռանախագահության կազմ։ Որքան էլ, օրինակ բարիդրացիական են Մոսկվայի եւ Թուրքիայի հարաբերությունները, սակայն Ռուսաստանը թույլ չի տա, որ Թուրքիան ակտիվանա այս գործընթացում»,- ամփոփեց թուքագետը։
Նշենք, որ ԵԽԽՎ-ում Ղարաբաղի հարցով հանձնաժողովը իր աշխատանքները վերսկսել է օրերս։