Ադրբեջանցի հաքերները փետրվարի 6-ի երեկոյան փորձել են կոտրել «Բի-Էս-Սի Բիզնեսի Աջակցման Կենտրոնին» պատկանող www.trainings.am վեբ-կայքը, սակայն՝ անհաջող։ Այդ մասին NEWS.am-ին հայտնեց Կենտրոնի տնօրեն Սամվել Գեւորգյանը։
Նրա խոսքով՝ հաքերները չեն կարողացել մտնել կայքի բազաները, նրանք ընդամենը մետաթագերն են կոտրել, որն էլ կայք մուտք գործելիս այցելուին ուղղորդում էր դեպի մեկ ուրիշ էջ։ «Բի-Էս-Սի» եւ «Վեբ» ընկերությունների մասնագետների ջանքերով կայքի աշխատանքը շատ արագ վերականգնվել է:
Նշենք, որ www.trainings.am-ը զուտ ուսումնական կայք է, այն որեւէ քաղաքական ուղղվածություն չունի։ Այն, որ ադրբեջանցիները չեն կարողացել կայքը կոտրել, ըստ Ս. Գեւորգյանի, հետեւանք է պաշտպանվածության բարձր աստիճանի։
«Մերը հոսթինգը Հայաստանում է արված, մասնագետների օգնությամբ կարողացանք շատ արագ կարգավորել»,-ասաց Ս. Գեւորգյանը։
«Բի-Էս-Սի»-ի տնօրենը կարծում է, որ ադրբեջանական հաքերների նման հարձակումները ստիպում են ավելի մեծ ուշադրություն դարձնել կայքերի անվտանգությանը՝ բարձրացնելով պաշտպանվածության մակարդակը։