Երեւանի Մաշտոցի պողոտայի 15 շենքի բակում («Ագենստվոյի շենք») այսօր` փետրվարի 9-ին, ժամը 16:20-ի սահմաններում, վերամբարձ կռունկը շուռ է եկել, որի հետեւանքով մեկ մարդ մահացել է:

Ինչպես NEWS.am-ին հայտնեց ֆոտոլրագրող Գագիկ Շամշյանը, դեպքի վայրում են ոստիկանության Կենտրոնականի բաժնի աշխատակիցները, արտակարգ իրավիճակների նախարարության, փրկարար ծառայության աշխատակիցները, դիակ տեղափոխող մեքենան:

Տարածքը հսկվում է ճանապարհային ոստիկանության կողմից:

Մեկ մարդ էլ մարմնական վնասվածքներ է ստացել: Մահացածը կռունկավարն է` 65-ամյա Վոլոդյա Կարապետյանը: Վայր ընկած կռունկը վնասել է մի քանի ավտոմեքենա:

MLL Industries շինարարարական կազմակերպությանը պատկանող 8 տոննանոց կռունկն ընկնելուց հարվածել է Մաշտոցի պողոտայի թիվ 15 շենքի երեսային հատվածին: Այս պահին փրկարարներն իրականացնում են շենքի թուլացած հատվածների` քարերի, ապակիների հեռացման աշխատանքներ:

Ըստ Տեխնիկական անվտանգության ազգային կենտրոնի` 2010 թ. մարտի 9-ին կատարվել է վերոնշյալ կռունկի փորձաքննություն, տրվել է թերությունների վերացման միջոցառումների ծրագիր: Կռունկը ունեցել է թերություն` կապված արգելակման համակարգի հետ, սակայն տվյալ թերությունը չէր վերացվել:

Դեպքի վայրում մեծ թվով քաղաքացիներ են հավաքվել:

Լուսանկարները եւ տեսանյութը՝ Գագիկ Շամշյանի