ԼՂՀ ԱԳ նախկին նախարար Արման Մելիքյանն այս պահին ԼՂ խնդրի կարգավորման նախադրյալները չի տեսնում: Այս մասին նա ասել է այսօր՝ փետրվարի 11-ին լրագրողների հետ հանդիպման ժամանակ, նշելով, որ ԵԱՀԿ Մինսկի խմբի առաջարկած կարգավորման «հիմնարար սկզբունքներն» անընդունելի են եւ անիրականանալի:
Դիտարկմանը, թե Բաքվում Մինսկի խմբի ֆրանսիացի համանախագահ Բեռնար Ֆասիեն հայատարարել է, թե այս անգամ իրենց տարածաշրջան այցի նպատակ է ԼՂ խնդրի խաղաղ կարգավորման «հիմնարար սկզբունքների» վերաբերյալ համաձայնություն ստանալ, Ա. Մելիքյանն արձագանքել է. «Արդեն 6-րդ տարին է, որ համանախագահները նույն բանն են հնչեցնում այս կամ այն ձեւով, բայց երեւի թե ժամանակն է, որ իրենք էլ իրենց գործողությունների եւ ասածների մեջ թարմություն մտցնեն եւ վերջապես տուրք տան իրական քաղաքական տրամաբանությանը եւ իրավիճակի ստույգ գնահատմանը, այլ ոչ թե իրենց պրոյեկտներին, որոնք իրագործելի չեն լինի»:
Ինչ վերաբերում է քարոզչական պատերազմին, ԼՂՀ ԱԳ նախկին նախարարը նշել է, որ ի տարբերություն Ադրբեջանի, Հայաստանում քարոզչությունը չի դարձել պետական քաղաքականության մաս, դրա համար էլ հայկական կողմի ջանքերն անպտուղ են անցնում: Նրա խոսքով, Ղարաբաղի հարցում Հայաստանն ու Ղարաբաղը չունեն համապարփակ, միասնական քաղաքականություն:
Որպես օրինակ, Մելիքյանը հիշեցրել է Սումգայիթի ջարդերի մասին պետական միջոցներով նկարահանվող ֆիլմը, ընդգծելով, որ դա պետական քաղաքականության մաս չի դառնում: Մելիքյանի կարծիքով, նման քայլերն էժանացնում են հարցը, իսկ ֆիլմ նկարելը վերածվում է պետական միջոցների վատնման:
