«Բարգավաճ Հայաստան» կուսակցության վերջին համագումարից հետո երկու տարի է անցել։ Դա կուսակցական շինարարության ակտիվ շրջան է եղել եւ այժմ կարելի է ասել, որ կուսակցությունը քաղաքական մեծ հեղինակություն ունի։ Այս մասին փետրվարի 12-ին տեղի ունեցած ԲՀԿ 5-րդ համագումարին հայտարարեց կուսակցության ղեկավար Գագիկ Ծառուկյանը։
Նա ընդգծեց, որ Հայաստանի քաղաքական դաշտում կուսակցություների ամրապնդման գործընթաց պետք է անցկացվի։ «Այսօրվա դրությամբ ԲՀԿ հայաստանյան քաղաքական դաշտի ամենահզոր ուժերից մեկն է։ Մենք պատասխանատվություն ենք կրում հանրապետությունում առկա գործընթացների համար, կողմ ենք քաղաքական սերնդի փոփոխությանը»,- հայտարարեց Ծառուկյանը, հայտնում է NEWS.am-ի թղթակիցը։
Նշենք, որ համագումարի ընթացքում «Բարգավաճ Հայաստան» կուսակցության ծրագրում որոշակի փոփոխություններ են մտցվել։ Համաձայն այդ լրացումների՝ ԲՀԿ-ն հավատարիմ է պաշտպանել անհատի ազատության իրավունքը, արդարությունը, հայրենասիրությունը եւ հանդուրժողականությունը։ Կուսակցությունը հավատարիմ է նաեւ երկրի տնտեսություն եվրոպական արժեքների ներդրմանը։ ԲՀԿ-ն հանդես է գալիս Ռուսաստանի հետ բոլոր ոլորտներում համագործակցության խորացմանը,ինչպես նաեւ ՀԱՊԿ-ի հետ համագործակցության ակտիվացմանը։
