ԱՄՆ վարչակազմն առաջարկում է 2012 թվականին Ադրբեջանին ավելի մեծ ռազմական օժանդակություն տրամադրել, քան Հայաստանին, ինչը առաջ է բերել ամերիկահայերի վրդովմունքը:
Հիշեցնենք, որ 2012-ի բյուջեի նախագծում Բարաք Օբաման ԱՄՆ արտաքին ռազմական օժանդակության եւ ռազմական ուսուցման ծրագրերի շրջանակներում առաջարկել է Հայաստանին տրամադրել 3 միլիոն 450 հազարի, իսկ Ադրբեջանին` 3 միլիոն 900 հազար դոլարի օգնություն:
Այս առնչությամբ, Ամերիկայի Հայ դատի հանձնախմբի գործադիր տնօրեն Արամ Համբարյանն ասել է. «Ռազմական օժանդակության առումով հավասարակշռությունը հօգուտ Ադրբեջանի խախտելու` նախագահի առաջարկը կարող է վտանգել Լեռնային Ղարաբաղի խնդրի խաղաղ կարգավորման գործընթացը, հատկապես եթե հաշվի առնենք Ադրբեջանի ղեկավարության կողմից նոր պատերազմ սկսելու սպառնալիքները»:
2012-ին Հայաստանին հատկացվելիք ֆինանսական օգնության ընդհանուր ծավալը, ըստ Օբամայի առաջարկի, մնալու է նույն մակարդակի վրա, ինչ նախորդ տարի` 40 միլիոն դոլար: Սպիտակ տան վարչակազմը, սակայն, առաջարկում է ընդհանրապես կրճատել առողջապահական ծրագրերի ֆինանսավորումը. 2011 ֆինանսական տարում հայաստանյան առողջապահությանն ուղղված ամերիկյան օգնությանը ծավալը կազմում էր 400 հազար դոլար:
Ադրբեջանին հատկացվող տնտեսական օժանդակության առումով ֆինանսավորման կրճատումն ավելի կտրուկ է լինելու` առաջարկվում է 2011-ի 22 միլիոնից այն նվազեցնել 25 տոկոսով եւ հասցնել 16 միլիոն դոլարի:
Սպիտակ տան վարչակազմը բավական պատկառելի գումարներ է առաջարկում տրամադրել Վրաստանին: Պաշտոնական Թբիլիսիին տրամադրվելիք տնտեսական օժանդակության ծավալը Կոնգրեսի կողմից հաստատվելու դեպքում 2012 թվականին կկազմի 66 միլիոն դոլար: Եվս 18 միլիոն դոլար կհատկացվի ռազմական օժանդակության ծրագրի շրջանակներում, իսկ Վրաստանի առողջապահական համակարգին ամերիկյան հատկացումները գալիք տարի կազմելու են 850 հազար դոլար:
Օբամայի վարչակազմի այս առաջարկները ամերիկահայերի կողմից բացասաբար են գնահատվում:
«Մենք հիասթափություն ենք ապրում այն պատճառով, որ չնայած հայ - ամերիկյան առեւտրային կապերը խորացնելու` նախագահի խոստմանը, որեւէ նշանակալի քայլ չի ձեռնարկվել, որ հնարավորություն կտար ընդլայնել տնտեսական կապերը Միացյալ Նահանգների եւ Հայաստանի միջեւ` մասնավորապես ազատ առեւտրի, երկակի հարկման եւ առեւտրի ու ներդրումների մասին շրջանակային համաձայնագրերի միջոցով: Նման պայմանավորվածությունները կխթանեին նաեւ աշխատատեղերի ստեղծումը թե՛ ԱՄՆ-ում եւ թե՛ Հայաստանում»,- ըստ «Ազատություն» ռադիոկայանի, ասել է Արամ Համբարյանը: