Ադրբեջանի իշխանությունների բազմաթիվ ռազմատենչ հայտարարությունները հռետորաբանություն են, իսկ ադրբեջանցիների կողմից պատերազմի վերսկսումը իրատեսական չէ։ Այս մասին փետրվարի 24-ին կայացած մամուլի ասուլիսում հայտարարել է ԵԱՀԿ Մինսկի խմբի ռուսաստանցի նախկին համանախագահ Վլադիմիր Կազիմիրովը՝ նշելով, որ ադրբեջանական հայտարարություններին պետք է ուշադրություն դարձնեն միջազգային կառույցները։

«Պետք է արձագանքել Ադրբեջանի ռազմական կոչերին։ Միջազգային հանրությունը ԵԱՀԿ գլխավորությամբ պետք է որոշումներ ընդունի այս հարցի կապակցությամբ, քանի որ Բաքվի իշխանությունների պատերազմի վերսկսման հնարավորության մասին հայտարարությունները մի շարք միջազգային նորմեր են խաթարում, ինչպես նաեւ խանգարում են խաղաղ կարգավորման գործընթացին»,- նշել է Կազիմիրովը։

Ասուլիսի մեկ այլ բանախոս, Ռուսաստանի սեւծովյան-կասպյան տարածաշրջանի քաղաքական եւ սոցիոլոգիական հետազոտությունների ինստիտուտի տնօրեն Վլադիմիր Զախարովը նշել է, որ Ադրբեջանի իշխանությունը ներկայումս զբաղված է պատմական իրողությունների խեղաթյուրմամբ։ Զախարովն ընդգծել է, որ ինքը մասնագիտությամբ պատմաբան է, եւ հասկանում է, որ իրականում Ադրբեջանն այժմ ապատեղեկատվության քարոզարշավ է տանում, խեղաթյուրելով պատմությունը, այդ թվում՝ Խոջալուի ու Սումգայիթի դեպքերը։

Վերլուծական ինստիտուտի տնօրենը նկատել է որ վերջին շրջանում Արեւմուտքը ակտիվ դեր է ստանձնել Հարավային Կովկասի հակամարտությունների լուծման հարցերում։ «Ռուսաստանը պետք է հիմնական դերն ունենա ղարաբաղյան հակամարտության կարգավորման մեջ եւ հստակ ձեւակերպի իր դիրքորոշումն այս հարցում»,- ասել է Զախարովը։