Ե’վ Հայաստանը, ե’ւ Ադրբեջանը միաժամանակ պետք է շփման գծից հանեն դիպուկահարներին, NEWS.am-ի թղթակցի հետ զրույցում տեսակետ հայտնեց Հայ ազգային կոնգրեսի արտաքին հարաբերությունների հանձնաժողովի անդամ, ԱԳՆ նախկին մամուլի քարտուղար Վլադիմիր Կարապետյանը`անդրադառնալով ԵԱՀԿ գործող նախագահ Աուդրոնիուս Աժուբալիսի հայտարարությանը: Նա նորմալ է համարում ԵԱՀԿ գործող նախագահի ցանկությունը, որ Հայաստանը, որպես բարի կամքի դրսեւորում, պետք է շփման գծից հանի դիպուկահարներին:
«ԵԱՀԿ նախագահի հայտարարությունը թեեւ բարի ցանկություն է, սակայն դիպուկահարներին հանելու կոչով պետք է դիմել երկու կողմերին»,-հայտարարեց ՀԱԿ ներկայացուցիչը: Նա նաեւ նշեց, որ այս համատեքստում պետք է հաշվի առնել հրադադարի խախտման այն բազմաթիվ դեպքերը, որոնք թույլ են տրվել ադրբեջանական կողմից: ԱԳ նախկին մամուլի քարտուղարը նաեւ ընդգծեց, որ ԵԱՀԿ նախագահը նույն` դիպուկահարներին հանելու հարցով դիմել է նաեւ Ադրբեջանում, երբ հանդիպել է տեղի ղեկավարության հետ:
Նշենք, որ Աժուբալիսը Բաքվում մարտի 14-ին հայտարարել է, թե ԼՂ հակամարտության կողմերը պետք է ջանքեր գործադրեն հրադադարի ռեժիմի ամրապնդման եւ փոխվստահության բարձրացման ուղղությամբ: Նա նաեւ նշել է, որ շփման գծում արձանագրված միջադեպերը հաստատում են իր այն համոզմունքը, որ «կողմերը պետք է դուրս բերեն դիպուկահարներին շփման գծից»: «Կողմերից եւ ոչ մեկը շահող դուրս չի գա ստեղծված իրավիճակում`ոչ քաղաքական, ոչ էլ ռազմական առումով»,-հայտարարել է ԵԱՀԿ գործող նախագահը: Նա, սակայն, կոնկրետ չի նշել, որ Ադրբեջանական կողմը պետք է միակողմանիորեն հանի դիպուկահարներին շփման գծից:
Միչդեռ այսօր` մարտի 18-ին Հայաստանի արտգործնախարար Էդվարդ Նալբանդյանի հետ համատեղ ասուլիսի ժամանակ Աժուբալիսը կոչ է արել Հայաստանին որպես բարի կամքի արտահայտություն՝ միակողմանիորեն հեռացնել դիպուկահարներին շփման գծից:
