Թուրքիայում հայկական Մեծամորի ատոմակայանի շուրջ անլուրջ գնահատականներին է միացել այդ երկրի էներգետիկայի եւ բնական պաշարների նախարար Թաներ Յըլդըզը, առաջարկելով՝ ոչ ավել, ոչ պակաս, հայկական ատոմակայանի փակման գործընթաց սկսել։
Թուրք նախարարը չկարողանալով տանել այն «ծանր վիրավորանքը», որ Հայաստանը տիրապետում է ատոմային էներգիայի, իսկ Թուրքիան՝ ոչ, փորձում է զավեշտալի գնահատականներ տալ Մեծամորի ատոմակայանի տեխնիկական վիճակին։
Հայկական ատոմակայանի անվտանգության բարձր աստիճանի եւ սեյսմակայունության մասին անտեղյակ թուրք նախարարը, չգիտես որտեղից, վերցրել է, թե ճապոնական ատոմակայանի հետ տեղի ունեցած դեպքից հետո միջազգային կառույցները ճնշումներ են գործադրում Հայաստանի վրա՝ Մեծամորի ատոմակայանը փակելու համար։ Սա էլ քիչ է, Թուրքիայի էներգետիկայի նախարարը ցանկանում է հայկական ատոմակայանի փակման գործընթաց սկսել։
Այլ երկրի ատոմակայանը փակել ցանկացող թուրք նախարարը միեւնույն ժամանակ թերություն է համարում այն, որ Թուրքիան չի մտնում ատոմային էներգետիկա ունեցող 30 երկրների ցանկում։
Թաներ Յլըդըզը պնդել է, թե իրենք անպայման կառուցելու են նախատեսված ատոմակայանները, քանի որ ոչ մի երկիր դեռ չի հրաժարվել ատոմային էներգետիկայից։ «Մենք ժամանակից տեխնոլոգիաներով ատոմակայան ենք կառուցելու»,-ասել թուրք նախարարը։
Նշենք, որ Թուրքիայում ատոմակայան կառուցող եւ սպասարկող կողմը Ռուսաստանն է լինելու, իսկ Թուրքիան կարծես թե չի ուզում հասկանալ, որ նույն Ռուսաստանն է կառավարում եւ ապահովում հայկական ատոմակայանի անվտանգությունը։
Արթուր Հակոբյան
