Հայաստանում ԱՄՆ դեսպան Մարի Յովանովիչը բացառում է ղարաբաղյան հակամարտության ռազմական լուծումը։ Այս մասին նա հայտարարեց մարտի 23-ին տեղի ունեցած մամուլի ասուլիսի ժամանակ՝ պատասխանելով Ադրբեջանի սպառնալիքների մասին հարցին։
Դեսպանը հիշեցրել է, որ ԱՄՆ-ն ԵԱՀԿ Մինսկի խմբի շրջանակներում սերտորեն համագործակցում է իր գործընկերների՝ Ֆրանսիայի եւ Ռուսաստանի հետ՝ նկատելով. Միջնորդները մեկ անգամ չէ, որ ասել են՝ հակամարտությունը պետք է լուծվի բանակցությունների ճանապարհով, «ղարաբաղյան հակամարտության ռազմական լուծում չի կարող լինել»։
Ամերիկյացի դիվանագետը կրկին ընդգծել է, որ բանակցություններն ընթանում են Մինսկի խմբի շրջանակներում, եւ որ համանախագահները վերջերս այցելել էին տարածաշրջան, հանդիպել բոլոր կողմերի հետ։ «Որպեսզի օգտագործեն Սոչիում ստեղծված պահը»,- նկատել է դիվանագետը՝ շեշտելով հակամարտության կարգավորման առաջընթացի եւ նոր միջադեպեր թույլ չտալու անհրաժեշտությունը։
Նշենք, որ Հայաստանի, Ռուսաստանի եւ Ադրբեջանի նախագահները Սոչիում մարտի 5-ին կայացած հանդիպման արդյունքներով ԼՂ հակամարտության վերաբերյալ համատեղ հայատարարություն էին ընդունել։ Հայտարարության կետերով, պետք է՝
1. Ամենակարճ ժամկետում ավարտել ռազմագերիների փոխանակումը
2. Ձգտել բոլոր վիճելի հարցերը լուծել խաղաղ միջոցներով եւ կրակի դադարեցման գծի երկայնքով կողմերի մասնակցությամբ անցկացնել հնարավոր միջադեպերի հետաքննություն` ԵԱՀԿ Մինսկի խմբի համանախագահների հովանու ներքո եւ ԵԱՀԿ գործող նախագահի հատուկ ներկայացուցչի աջակցությամբ: