Հայաստան-Ռուսաստան ընտրական խաղին Հայաստանի հավաքականը պատրաստվում է ամենայն պատասխանատվությամբ եւ բարձր մարզավիճակում է: Այս մասին NEWS.am-ի թղթակցի հետ զրույցում ասաց Հայաստանի ֆուլբոլի ֆեդերացիայի մամուլի խոսնակ Տիգրան Իսրայելյանը: Նա նշեց, որ խաղից առաջ Հայաստանի հավաքականը մարզումներ է անցկացնում Հանրապետական մարզադաշտում:

«Այսօր եւս ժամը 18:30-ին նախատեսված են մարզումներ: Մարզումներն ընթանում են օրական մեկ անգամ եւ կտեւեն մինչեւ խաղի նախօրեն` մարտի 25-ը»,-նշեց ՀՖՖ մամուլի խոսնակը: Նա նաեւ փոխանցեց, որ  Ռուսաստանի հավաքականը Երեւան կժամանի վաղը`մարտի 25-ին, ժամը 12:00-ին:

NEWS.am-ը տեղեկություն ստացավ նաեւ, որ Հայաստան-Ռուսաստան խաղի տոմսերը, որոնք 3, 5 եւ 7 հազար դրամ արժեն, այս օրերին կարելի է ձեռք բերել մինչեւ 45-50 հազար դրամով: ՀՖՖ-ից, սակայն, հայտնեցին, որ տոմսերը դեռ մի քանի օր առաջ ամբողջությամբ սպառվել են: Ըստ երեւույթին` որոշ «հեռատես» մարդիկ որոշել են փող աշխատել եւ նախօրոք գնված տոմսերը վերավաճառել մի քանի անգամ թանկ գնով: ՀՖՖ-ն խոստացավ ուսումնասիրել տեղեկությունն ու պարզաբանում տալ:  

Հիշեցնենք, որ  «Եվրո 2012»-ի ընտրական փուլի Հայաստան-Ռուսաստան հանդիպումը կկայանա մարտի 26-ին,  «Հանրապետական» մարզադաշտում` ժամը 19-ին: