Երկարաժամկետ հեռանկարում Ղարաբաղի խնդիրը կարելի է լուծել, եթե միջազգային հանրությունը Հայաստանին ու Ադրբեջանին ներգրավի Եվրամիության եւ ՆԱՏՕ-ի կառույցներ: Այս մասին NEWS.am-ի թղթակցի հետ զրույցում ասաց Արտաքին քաղաքականության գերմանական հանրության Ռուսաստանի եւ ԱՊՀ գծով հետազոտական ծրագրերի տնօրեն Ալեքսանդր Ռարը: Նրա խոսքով, եթե այդ երկու երկրները կտնեն այս կամ այն միջազգային կառույց, դա թույլ կտա Ղարաբաղի հարցը լուծել հաշտությամբ:
Խոսելով ռազմական գործողությունների վերսկսման հավանականության եւ ստատուս-քվոյի պահպանության մասին, Ռարը նշել է, որ եթե նույնիսկ ստատուս քվոն փոքր ինչ փոխվի, ապա միայն խաղաղության կողմը:
«Ներկա պահին ռազմական գործողությունների վերսկսումը քիչ հավանական է: Ստատուս քվոն ձեռնտու է բոլորին, բացի Ադրբեջանից եւ միջազգային հանրությունը ունի բավարար կշիռ, տարածաշրջանում անցանկալի զարգացումները կանխելու համար»,- ասել է փորձագետը, հավելելով, որ ինչքան էլ Ադրբեջանը հայտարարի, որ պատրաստ է ուժով գրավել Ղարաբաղը, ռազմական գործողությունները ձեռնտու չէ նաեւ իրենց եւ այդ երկրի ղեկավարությունը դա շատ լավ հասկանում է:
«Դա կխրտնեցնի Ադրբեջանի տնտեսության մեջ արտասահմանյան ներդրողներին, իսկ այդ ներդումները հսկայական են»,- նկատել է Ռարը: Նա նաեւ ընդգծել է, որ դա չի նշանակում, որ Ադրբեջանը տնտեսական շահերից ելնելով կհրաժարվի Ղարաբաղը վերադարձնելու մտքից:
