Բացվել է «Հայաստանի բիզես աշխարհը» բլոգը www.Doing-business-in-armenia.com հասցեով, որի նպատակն է Հայաստանի գործարարների համար ստեղծել մի հարթակ, որտեղ նրանք կկարողանան ներկայացնել իրենց կարծիքները Հայաստանի բիզնես միջավայրի եւ խնդիրների լուծումների վերաբերյալ:

Բլոգի հիմնադիրը «Բի Էս Սի» Բիզնեսի Աջակցման  Կենտրոնն է (www.bsc.am ), որի տնօրեն Սամվել Գևորգյանը NEWS.am-ի թղթակցի հետ զրույցում նշեց, որ բլոգի ստեղծման մտահղացումն առաջացել է «Բի Էս Սի»-ի՝ կողմից հրատարակված «Ինչպես սկսել սեփական բիզնես Հայաստանում»  գրքի արձագանքների եւ բիզնես միջավայրի առողջացմանը վերաբերող քննարկումների ընթացքում։ «Իսկապես հայ գործարարներին անհրաժեշտ է մի այնպիսի միջավայր, թեկուզ վիրտուալ, որտեղ նրանք կկարողանան ազատ արտահայտել իրենց մտքերը, ներկայացնել իրենց փորձը, առաջարկել լուծումներ։ Մեր կարծիքով ինտերնետն այսօր լավ հնարավորություն է գործարար ակումբ ձեւավորելու համար, ինչը եւ փորձելու ենք իրականացնել այս բլոգի միջոցով»,- ասաց Ս. Գեւորգյանը՝ նկատելով, որ ներկայումս դեռ նորաբաց կայքում գործարարները ակտիվ չեն, սակայն առաջիկայում գրանցվող գործարարների ակտիվություն են ակնկալում:

«Պետք է հաշվի առնել այն փաստը, որ Հայաստանի գործարարները ինտերնետում հիմնականում պահպանողական են և ոչ ակտիվ, սակայն «սառույցը տեղից շարժվում է», եւ նրանք էլ կամաց-կամաց փորձում են նոր միջոցներից օգտվել: Բացի դրանից ստեղծված ռեսուրսը փորձի, գիտելիքի հնարավորություն է տալիս, որը նաեւ կարող են մեկնաբանել եւ ամենակարեւորը իրենց հարցերին անկեղծ պատասխաններ ակնկալել, սա շատ կարեւոր հանգամանք է յուրաքանչյուր բլոգի համար»,- ասաց «Բի Էս Սի»-ի տնօրենը՝ ավելացնելով, որ հետագայում ակնկալում են, որ կայքի այցելուներ կդառնան նաեւ բլոգերում եւ սոցիալական կայքերում ակտիվություն ցուցաբերող պետական պաշտոնյաները, ինչպես նաեւ Հայաստանում ներդրումներ կատարելու ցանկություն ունեցող սփյուռքահայերը։