Կառավարությունը բացասական եզրակացություն է պատրաստել ՀՅԴ պատգամավորական խմբակցության օրենսդրական այն նախաձեռնության վերաբերյալ, որով առաջարկվում է կտրուկ բարձրացնել նվազագույն աշխատավարձը Հայաստանում:
Նշենք, որ նվազագույն ամսական աշխատավարձը ներկայումս կազմում է 32.5 հազ. դրամ: Դաշնակցությունն առաջարկում է նվազագույն աշխատավարձը սահմանել միջին աշխատավարձի 50 տոկոսի չափով եւ ամեն տարի ճշգրտել գնաճի ցուցանիշին համապատասխան: Այսինքն` նվազագույն աշխատավարձը պետք է գերազանցի 50 հազ. դրամը:
Դաշնակցությունն իր առաջարկությունը հիմնավորել է Սահմանադրության 32-րդ հոդվածի պահանջները կատարելու անհրաժեշտությամբ, ինչպես նաեւ միջազգային փորձով;
Նշենք, որ ՀՀ սահմանադրության 32-րդ հոդվածի երկրորդ մասով սահմանվում է. «Յուրաքանչյուր աշխատող ունի արդարացի եւ օրենքով սահմանված նվազագույնից ոչ ցածր աշխատավարձի, ինչպես նաեւ անվտանգության ու հիգենիայի պահանջները բավարարող աշխատանքային պայմանների իրավունք»:
Կառավարությունն իր եզրակացության մեջ նշել է, որ նվազագույն աշխատավարձի բարձրացումը կհանգեցնի բյուջեի եկամուտների կրճատման եւ ծախսերի ավելացման, ինչպես նաեւ կստեղծի գնաճ: Նշվել է, որ միայն այդ քայլի հետեւանքով տնտեսությունում լրացուցիչ գնաճը կկազմի 5 տոկոս: