Գյումրիի բժշկական կենտրոնի մասնաշենքը, որի շինարարությունը մեկնարկել է մեկ ամիս առաջ, նախագծված է թերություններով ու բացթողումներով, չի համապատասխանում պահաջված չափանիշներին եւ ամբողջովին պետք է փոփոխության ենթարկել: Այսօր` ապրիլի 6-ին Գյումրի այցելության ժամանակ հայտարարել է ՀՀ առողջապահության նախարար Հարություն Քուշկյանը, ով ավելի քան մեկ ժամ ծանոթացել է հիվանդանոցի նախագծին: Նախարարը հանձնարարել է վերանայել ու փոփոխել հիվանդանոցի նախագիծը:
«Ամբողջությամբ պետք է փոխել նախագիծը, այն չի համապատասխանում որակի պահանջված չափանիշներին: Բացի այդ մինչեւ 2012 թ-ի մայիս չենք հասցնի այս նախագծով ավարտել անգամ դրսի`քարային աշխատանքները, բա ներքին հարդարումը…»,-ասել է Քուշկյանը:
Գյումրիի բժշկական կենտրոնի շինարարությունն արդեն մեկ ամիս է, ինչ մեկնարկել է, հիմքերի փորման աշխատանքներն ավարտվել են, քարային աշխատանքներ են իրականացվում: Կառուցվում է 300 մահճակալ հզորությամբ բազմաֆունկցիոնալ հիվանդանոց ` Համաշխարհային բանկի վարկային միջոցների հաշվին:
Նախարարն այսօր նաեւ մտադրություն է հայտնել նորակառույց հիվանդանոցին կից գործող մանկական հիվանդանոցի որոշ ծառայություններ` խոհանոց, լվացքատուն, կաթսայատուն մեկտեղել երկու հիվանդանոցների համար: «Այս կերպ մենք զգալի ֆինանասներ կխնայենք»,-ասել է Հարություն Քուշկյանը: