Նոր մանրամասներ են ի հայտ գալիս Վրաստանի տեղի ունեցած միջադեպի մասին, որի պատճառով մարտի 28-ին Հայաստանը գրեթե ամբողջությամբ զրկվել էր ինտերնետից:
Վրացական լրատվամիջոցների տվյալներով, առանց համակարգչի «հաքերը» 75-ամյա Հայաստան Շաքարյանն է:
Վրաստանի ՆԳՆ մամուլի քարտուղար Զուրաբ Գվենետաձեի խոսքով, տարեց կնոջ նկատմամբ քրեական գործ է հարուցվել ուրիշի ունեցվածքին վնաս հասցնելու մեղադրանքով, որը նախատեսում է 1-3 տարվա ազատազրկում:
Գերատեսչության տվյալներով, կինը հողում պղինձ է փնտրել եւ վնասել է «Երկաթուղի Տելեկոմ»-ին պատկանող օպտիկամանրաթելային մալուխը (մալուխը թաղված է եղել հողի տակ` 40 սանտիմետր խորությամբ, ռելսերի մոտ):
Ինքը կինը ամեն ինչ հերքում է: «Նայեք ինձ վրա, մի՞թե կարող էի ինչ-որ փոսում մալուխ կտրել»,- նշել է տարեց կասկածյալը: Ոստիկանության կասկածները չի կիսում նաեւ նրա որդին:
Հիշեցնենք, որ մարտի 28-ին գրեթե ողջ Հայաստանը առանց ինտերնետի էր մնացել, քանի որ Վրաստանում վթարվել էին երկու մալուխները, որոնք մեր երկիրը միացնում են ինտերնետին:
Սա բոլորովին էլ առաջին դեպքը չէ, երբ Վրաստանում թերությունների պատճառով Հայաստանը «կտրվում է կապից»:
Հայ ինտերնետ-գիտակները վրդոված են նման վերաբերմունքից: Գլոբալ ցանցից գլուխ հանողները վստահ են, որ ժամանակակից տեխնոլոգիաների պայմաններում վաղուց կարելի էր այլընտրանքային աղբյուրներ գտնել: Իրականում Վրաստանով մի քանի մալուխ է անցնում, գումարած Իրանից եկող մալուխը: Այդ դեպքում ինչո՞ւ է Հայաստանը շարունակում կախված մնալ մեկ աղբյուրից:
Ավելին, հայ ինտերնետ-տեխնոլոգները կասկածում են տատիկի մասին վարկածին, որ «արյունռուշտ կերպով վնասել էր մալուխը»: Ինչպես կարող են կարտոֆիլ ու պղինձ փնտրողները վնասել միանգամից մի քանի մալուխների հանգուցային կետը:
Բայց եթե անգամ դա այդպես է, ինչու է նման ահռելի նշանակություն ունեցող մալուխը գտնվում նման փոքր խորության տակ:
Այդ հարցին առայժմ պատասխան ստանալ չի հաջողվել:
Չի բացառվում, որ շուտով կրկին կրկնվի offline իրավիճակը: Ո՞ւմ են այս անգամ հանցագործ համարելու: