Ադրբեջանում տեղ են գտել ինտերնետը գրաքննության ենթարկելու փորձեր, սակայն ոչ ակնհայտ: Այդ մասին նշվում է Freedom House-ի նոր զեկույցում, որը վերաբերում է աշխարհի տարբեր երկրներում ինտերնետում գրաքննություն իրականացնելուն:
Ադրբեջանի կառավարությանը քննադատող բազմաթիվ լրագրողներ ենթարկվել են ճնշումների ու հետապնդումների, իսկ որոշները պաշտոնատար անձանց քննադատելու համար` նույնիսկ ծեծի:
«Լրագրողներ առանց սահմանների» կազմակերպության տվյալներով` անկախ եւ ընդդիմադիր լրագրողներն աշխատում են իշխանությունների մշտական ճնշումների ներքո: Նրանցից շատերը վստահ են, որ Ազգային անվտանգության եւ Ներքին գործերի նախարարությունները հետեւում են հեռախոսային խոսակցություններին, ինտերնետ շփումներին: Հսկողության տակ են հատկապես արտասահմանցիների, եւ միջազգային կազմակերպությունների հետ կապեր ունեցող գործրարների հեռախոսներն ու ինտերնետ հեռահաղորդակցության միջոցները:
Օրինակի համար, դեպք է գրանցվել, երբ Ադրբեջանի Ազգային անվտանգության նախարարությունը քննել է 43 մարդ, որոնք քվեարկել են «Եվրատեսիլում» հայ մասնակցի օգտին:
«OpenNet Intitiative» կազմակերպության տվյալներով` Ադրբեջանի կառավարությունը չի կիրառում ինտերնետի ուղիղ գրաքննություն, թեեւ բավականին կոպիտ է վարվում քաղաքական ընդդիմության հետ:
Ադրբեջանի բարձրաստիճան պաշտոնյաները հայտարարում են, որ կառավարությունը որեւէ կերպ չի միջամտում երկրի ինտերներտ տիրույթին: Իսկ իշխող կուսակցության ներկայացուցիչները սովորաբար այդ ոլորտին ուղղված քննադատությունն անվանում են միջազգային կառույցների կողմից Ադրբեջանի վրա ճնշում գործադրելու փորձ:
