Երեւանում այսօր՝ ապրիլի 17-ին ժամը 12:45-ի սահմաններում, ավտովթար է տեղի ունեցել Սարալանջի նորակառույց փողոցում, որտեղ միմյանց են բախվել երեք ավտոմեքենաներ (ֆոտոռեպորտաժ):

Ինչպես NEWS.am-ին հայտնում է ֆոտոլրագրող Գագիկ Շամշյանը, նշված փողոցում միմյանց են բախվել Volkswagen մակինիշի 15 ՏՕ 761 համարանիշի, Opel մակնիշի 03 ՏԼ 628 համարանիշի եւ «ԳԱԶ-3110» մակնիշի 05 ՍՍ 455 համարանիշի ավտոմեքենաները:

Վթարի վայրից մարմնական վնասվածքներով թիվ 1 համալսարանական հիվանդանոց են տեղափոխվել Volkswagen –ի վարորդ, 31-ամյա Վաղինակ Դավթյանը եւ ԳԱԶ-3110-ի վարորդ, 28-ամյա Հակոբ Սիմոնյանը: Դեպքի վայր ժամանած Երեւանի Ճանապարհային ոստիկանության աշխատակիցները փորձում էին բացել խցանումը, քանի որ այդ ճանապարհը նեղ է եւ մարդկանց կուտակումը խցանման պատճառ էր դարձել:

Դեպքի վայրում քննչական աշխատանքները ղեկավարել է ոստիկանության քննչական գլխավոր վարչության Երեւանի քննչական գլխավոր վարչության ճանապարհատրանսպորտային հանցագործությունների քննության բաժնի քննիչ Խաչիկ Սամվելյանը:

Նրա հանձնարարականով երեք ավտոմեքենաները տեղափոխվել են ՃՈ տուգանային հրապարակ:

Լուսանկարները եւ տեսանյութը՝ Գագիկ Շամշյանի