Եվրոպայի Խորհրդի խորհրդարանական վեհաժողովում հայկական պատվիրակության ներկայացուցիչները կրկին պնդել են իրենց հայտարարությունը, թե ԵԽԽՎ նախագահ Մեւլութ Չավուշօղլուն իրենց զրկել է Ստարսբուրգում Թուրքիայի վարչապետ Ռեջեփ Թայիփ Էրդողանին հարց տալու իրավունքից: Այդ մասին նրանք նշել են Երեւանում կայացած մամուլի ասուլիսում` մեկնաբանելով Չվավուշօղլուի հայտարարությունը, թե հայկական պատվիրակությանը տրվել է ձայնի իրավունք:
«Չավուշօղլուն ապատեղեկատվություն է տարածում, ինձ եւ «Ժառանգության» պատգամավոր Զարուհի Փոստանջյանին գործնականում զրկել են Էրդողանին հարց տալու հնարավորությունից, քանի որ մեր անունները գրել են ցանկի վերջում: Ապա ԵԽԽՎ քարտուղարությունում մեզ գրավոր պարզաբանեցին, որ դա արվել է անձամբ Չավուշօղլուի հրահանգով: Նա ըստ կանոնադրության ունի նման իրավունք: Մեր պատվիրակությունից հարց տալու հնարավորություն ունեցել է ՀՅԴ պատգամավոր Արմեն Ռուստամյանը»,- ասել է Զոհրաբյանը:
Ընդ որում, նա շեշտել է, թե Չավուշօղլուն իրեն պահել է ոչ թե որպես ԵԽԽՎ նախագահ, այլ թուրք լոբբիստ: «Բայց Էրդողանին մեզնից պահելու Չավուշօղլուի բոլոր փորձերը ձախողվեցին: Ես հանդիպեցի Թուրքիայի վարչապետին ԵԽԽՎ միջանցքում եւ ասացի երեսին այն, ինչ մտածում եմ: Ավելին, ես հանձնեցի նրան Հայոց ցեղասպանության երեխա զոհերի լուսանկարները»,- ամփոփել է պատգամավորը: