ԵԽԽՎ գարնանային նստաշրջանի հենց առաջին նիստին հայկական պատվիրակությունը կրկին խստորեն հայտարարել է ԼՂՀ հարցով ենթահանձնաժողովի ստեղծման անթույլատրելիության մասին։ Ապրիլի 18-ին լրագրողների հետ հանդիպման ժամանակ այս մասին հայտարարեց ԵԽԽՎ հայկական պատվիրակության ղեկավար Դավիթ Հարությունյանը։
Նա նաեւ հայտնեց, որ ենթահանձնաժողովի ղեկավար Հուգլա ի Կոստային առանձին ասել է, որ ենթահանձնաժողովի աշխատանքը հղի է բանակցային գործընթացում լրացուցիչ լարվածության առաջացնելու տեսանկյունից։
Անդրադառնալով Թուրքիայի վարչապետ Ռեջեփ Թայիփ Էրդողանի՝ Հայոց ցեղասպանության եւ հույների զանգվածային սպանությունների վերաբերյալ Ստրասբուրգում արած հայտարարությանը՝ Հարությունյանը նշեց. «Թուրքիայի վարչապետի կոշտ հայտարարություններն այս առումով մեկ անգամ եւս վկայում են Անկարայի կողմից վարվող անզիջում քաղաքականության մասին»։
Նշենք, որ ԵԽԽՎ-ում ԼՂՀ հարցով ենթահանձնաժողով ստեղծելու Ադրբեջանի պատվիրակության ջանքերը հաջողությամբ պսակվել էին մի քանի ամիս առաջ։ Երեւանում այդ ենթահանձնաժողովի աշխատանքն անարդյունավետ են համարում՝ նշելով, որ ղարաբաղյան հարցի քնարկման միակ ձեւաչափը պետք է մնա ԵԱՀԿ Մինսկի խումբը։