Սերբիայի, Խորվաթիայի եւ Կոսովոյի միջեւ հարաբերությունների կարգավորման գործընթացում վստահություն կարող է վայելել միայն ԵԱՀԿ-ն։ Այս մասին հայտարարել է ԵԱՀԿ խորհրդարանական վեհաժողովի նախագահ Պետրոս Էֆթիմիուն՝ ապրիլի 21-ին ելույթ ունենալով Ջոնս Հոփկինսի համալսարանում։
«Հայաստանի, Ադրբեջանի եւ Լեռնային Ղարաբաղի հարաբերություններում եւս ԵԱՀԿ-ին չեն կարող փոխարինել ո’չ ՆԱՏՕ-ն, ո’չ ԵՄ, որովհետեւ դրանցից ոչ մեկը չունի տարածաշրջանների եւ այդտեղ ապրող ազգերի մասին այնքան խորը պատկերացումներ, որքան ԵԱՀԿ-ն... Ինչո՞ւ է պետք նոր բան մոգոնել, եթե արդեն կա ԵԱՀԿ-ն»,- ասել է նա:
Անդրադառնալով Ռուսաստանին՝ Էֆթիմիուն նշել է, որ այդ երկրի հարաբերությունները ԱՄՆ-ի, ԵՄ-ի, ՆԱՏՕ-ի հետ պետք է մրցակցայինից վերածվեն կառուցողական-գործընկերայինի, իսկ դրա համար միակ եւ արդյունավետ վայրը ԵԱՀԿ-ն է։
«2008թ. Ռուսաստանի նախագահ Դմիտրի Մեդվեդեւը հայտարարեց անվտանգության պահովման մեխանիզմների հարցերի վերաբերյալ Եվրոպայի հետ երկխոսության անհրաժեշտության մասին, եւ ԱՄՆ նախագահ Բարաք Օբաման հայտարարեց Ռուսաստանի հետ նոր որակի հարաբերությունների սկսման մասին։ Այժմ ժամանակն է Ռուսաստանի եւ ԱՄՆ-ի հարաբերությունները «հունի մեջ գցել» եւ դրա համար լավագույն վայրը ԵԱՀԿ-ն է»,- ասել է Էֆթիմիուն։
Նա նշել է, որ Ռուսատանի վարած քաղաքականությունը երկակի է։ «Մի կողմից Ռուսաստանը ցանկանում է Եվրոպայի մաս լինել, մյուս կողմից «կարոտում է» անցյալը»,- ասել է ԵԱՀԿ ԽՎ նախագահը։
