Այս պահին Երեւանի ճանապարհային ոստիկանության աշխատակիցները` Երեւանի ՃՈ պետ Արսեն Մարդոյանի գլխավորությամբ, փորձում են բացել Երեւանից դեպի Աշտարակ տանող  ճանապարհը, քանի որ հսկայական խցանում է առաջացել:

Ինչպես NEWS.am-ին հայտնեց ֆոտոլրագրող Գագիկ Շամշյանը, ժամը 16:20-ի սահմաններում Գեւորգ Չաուշի փողոցում, դեպի Կարմիր Խաչի հիվանդանոց գնացող ճանապարհին իրար են բախվել Mercedes C մակնիշի 10 ԼԼ 310 համարանիշի եւ Mercedes G դասի ավտոմեքենաները:

Բախման հետեւանքով G դասի մեքենան գլխիվայր շրջվել է: Mercedes C դասի վարորդը` Ալվարդ Թամիրյանն ու նրա քույրը` 51-ամյա Արփիկ Թամիրյանը մարմնական վնասվածքներով տեղափոխվել են «Արմենիա» բժշկական կենտրոն: Ավելի ուշ 41-ամյա Ալվարդ Թամիրյանը հիվանդանոցում մահացել է: 

Ավտոմեքենաներից վիրավորներին դուրս հանելու համար դեպքի վայր էին ժամանել Հայաստանի արտակարգ իրավիճակների նախարարության փրկարար ծառայության հատուկ փրկարար ջոկատի աշխատակիցները, որոնք վիրավորներին դուրս բերեցին մեքենայից: Քննչական աշխատանքները ղեկավարում է ոստիկանության քննչական գլխավոր վարչության Երեւանի քննչական վարչության ճանապարհա-տրանսպորտային հանցագործությունների քննության բաժնի հատկապես կարեւոր գործերով քննիչ Կարեն Ստեփանյանը:

Մինչ ոստիկանների ժամանելը Mercedes G դասի մեքենայի վրայից համարանիշները հանել էին: Մի քանի երիտասարդներ հայհոյանքներ էին տալիս` խոչընդոտելով լրագրողական աշխատանքին:

Ջիփ մեքենայի վարորդը` Արագածոտնի մարզի Օշական գյուղի բնակիչ, 22-ամյա Գեւորգ Սերգեյի Մելիքյանը ինքնակամ ներկայացել է քննիչին: Նա  հանցավոր աշխարհում հայտնի «օրենքով գող» «Օշականցի Գեւորիկ» մականունով Գեւորգ Մելիքյանի եղբոր որդին է: Վերջինս, ի դեպ, ֆոտոլրագրողին հայհոյողն ու աշխատանքը խոչընդոտողն էր:

Լուսանկարները եւ տեսանյութը` Գագիկ Շամշյանի