Հայաստանի տեղեկատվական տեխնոլոգիաների ոլորտի մասնաբաժինը ՀՆԱ-ում հասել է 5 տոկոսի, եւ այդ ցուցանիշով ՏՏ-ն հավասարվել է հանքարդյունաբերությանը։ Այդ մասին այսօր՝ ապրիլի 29-ին սփյուռքահայ գործարարների հետ համաժողովի ժամանակ հայտարարեց ՀՀ վարչապետ Տիգրան Սարգսյանը։ Երկու ոլորտներում էլ 5000-ական մարդ է աշխատում, սակայն, ըստ վարչապետի, ՏՏ ոլորտում աշխատավարձերն ավելի բարձր են։
«ՏՏ-ի հիմնական ռեսուրսը ինտելեկտն է, այդ պատճառով հիմնական ուշադրությունը պետք է դարձնենք կրթության վրա»,- ասաց Տ. Սարգսյանը։
Որպես կարեւոր առավելություն նշվեց մաթեմատիկայի դպրոցը, որը վարչապետի տեղեկացմամբ՝ լավագույններից մեկն է ԱՊՀ-ում։ Այդ դպրոցի ավանդույթները պահպանելու համար վարչապետը խոստացավ մեծ ուշադրություն դարձնել համալսարանական կրթությանը։