Պետեկամուտների կոմիտեում էլեկտրոնային ծրագիր է ներդրվել, որը հարկատունների եւ հարկային մարմինների միջեւ օն-լայն շփման կատարելագործում է ենթադրում: Այս մասին այսօր` մայիսի 3-ին նշվել է ՊԵԿ-ում բանկային համակարգի ղեկավարների հետ հանդիպման ժամանակ:
Ծրագրի գործարկման պահից բոլոր գործարարներին հատուկ ծածկագիր է տրամադրվելու, որի միջոցով նրանք հնարավորություն կունենան տեսնել իրենց բիզնեսին վերաբերող այն բոլոր տվյալները, որոնք ՊԵԿ-ում են ֆիքսվում` կատարված ներմուծումներից մինչեւ քարտեր, գերավճարներ, հաշվանցումներ եւ այլն:
«Ընդհանուր առմամբ, երեք տարվա ծրագիր ենք հաստատել. հարկային-մաքսային բարեփոխումները 118 միջոցառում են նախատեսում` մաքսակետերի շինարարություն` եվրոպական չափանիշներով, հարկայինում լրիվ նոր ֆորմատի սպասարկման կենտրոններ, սպասարկման նոր գործելաոճ, էլեկտրոնային շփում եւ այլն»,-նշել է ՊԵԿ-ի նախագահ Գագիկ Խաչատրյանն, ընդգծելով, որ ՊԵԿ-ի հետ բանկային համակարգի գործառույթների շուրջ 90 տոկոսն արդեն էլեկտրոնային է:
«Վերջիններս ՊԵԿ-ի ղեկավարին ներկայացվեցին առկա բոլոր խնդիրները` օրենսդրական, ենթաօրենսդրական, որոնք խանգարում են բիզնեսի զարգացմանը: Նաեւ ներկայացվեցին օրենսդրական փոփոխությունների այն նախագծերը, որոնք կաշխուժացնեն ոչ միայն բանկային համակարգը, այլ նաեւ իրական հատվածի այլ բիզնեսների զարգացումը»,-իր հերթին նշել է ՀՀ Բանկերի միության նախագահ Աշոտ Օսիպյանը: