Հայտնի գեղանկարիչ Մինաս Ավետիսյանի` Գյումրիում գտնվող որմնանկարների տեղափոխման դեմ բողոքը բացարձակ անիմաստ է: Այս մասին NEWS.am-ի թղթակցի հետ զրույցում ասաց Շիրակի մարզպետարանի տեղեկատվության բաժնի պետ Սամվել Գրիգորյանը` անդրադառնալով Գյումրիում մի խումբ արվեստագետների եւ շարքային քաղաքացիների բողոքին, ովքեր դժգոհում են շիրակցի որմնանկարչի ստեղծագործությունները «Զվարթնոց» օդանավակայան տեղափոխելու ՀՀ կառավարության որոշման դեմ:
«Մեր մշակույթի գործիչների ըմբոստությունը ես չեմ հասկանում: Որտե՞ղ էինք նրանք 23 տարի, երբ այդ որմնանկարները փչանում էին անձրեւների, քամու եւ ձյան տակ: Եվ ամենակարեւորը, որմնանկարները ոչ թե հանրապետությունից դուրս են հանվում, այլ տեղափոխվում է մի քաղաքից մյուս քաղաք: Մենք 23 տարի շարունակ ոչ մի բան չենք արել, որ որմնանկարները փրկենք ոչնչացումից, եւ հիմա, երբ մարդիկ միլիոններ են ներդնում, որ փրկեն Մինասի գործերը, գյումրեցիները բողոքում են»,-տարակուսեց Գրիգորյանը: Նա նշեց, որ գյումրեցիների բողոքը հիմնավոր կլիներ, եթե Մինասի ստեղծագործությունները դուրս բերվեին Հայաստանից: Շիրակի մարզպետարանի տեղեկատվության բաժնի պետի խոսքով, որմնանկարները շահում են` տեղափոխվելով օդանավակայան, քանի որ տեսանելի կլինեն ամբողջ աշխարհի համար:
Որմնանկարների տեղափոխման առնչությամբ, NEWS.am-ի զրուցակցի հավաստմամբ, իր դիրքորոշումն է հայտնել նաեւ Մինասի որդին` Արման Ավետիսյանը`տարակուսելով գյումրեցիների բարձրացրած բողոքից:
Ի դեպ, որմնանկարների տեղափոխման դեմ իր բողոքն էր հայտնել նաեւ ՀԿԿ կենտկոմի առաջին քարտուղար Ռուբեն Թովմասյանը, ով մամուլի միջոցով կառավարության որոշումը որակել էր «վանդալիզմի տիպիկ օրինակ»: Արձագանքելով Թովմասյանին` Գրիգորյանը նշեց, թե «վանդալիզմը անտարբերությունն է` որմնանկարները 23 տարի շարունակ առանց խնամքի`անձրեւի եւ ձյան տակ թողնելը:
Ինչպես ավելի վաղ հայտնել է NEWS.am-ը, Մինասի 2 որմնանկարները՝ «Երկանք» եւ «Թել են մանում», կտեղադրվեն «Զվարթնոց» օդանավակայանում։ «Երկանք» որմնանկարը ներկայում գտնվում է Գյումրիի «Էլեկտրատեխնիկական գործարանի» նախկին ճաշարանի շենքում, իսկ «Թել են մանում» որմնակարը՝ Գյումրիի «Գալվանոմետր գործարան (Օմեգա)» գործարանի շենքում։ «Երկանք»-ը տեղափոխվում է «Զվարթնոց»-ի նախագահական համալիր, իսկ «Թել են մանում»-ը` «Զվարթնոց» օդանավակայանի նոր ուղեւորային համալիրի մեկնման սրահ։
Որմնանկարների տեղափոխման բոլոր ծախսերը հոգում է «Զվարթնոց» օդանավականը։ Որմնանկարները շարունակելու են մնալ պետական սեփականություն։