Ոչինչ համաձայնեցված չէ, քանի դեռ ամեն ինչ համաձայնեցված չէ։ NEWS.am-ի թղթակցի հետ զրույցում այս մասին հայտարարեց փորձագետ, Կովկասի ինստիտուտի փոխտնօրեն Սերգեյ Մինասյանը՝ մեկնաբանելով ղարաբաղյան հակամարտության կարգավորման վերաբերյալ Ադրբեջանի ԱԳ նախարար Էլմար Մամեդյարովի հայտարարությունը։

«Մամեդյարովի խոսքերը նրա սեփական ցանկությունների հավաստումն են, ոչ ավելին: Բնական է, ոչ ոք չի պատրաստվում դուրս հանել զորքերը, քանի դեռ մյուս կողմից համարժեք քայլեր չեն եղել»,- ընդգծեց փորձագետը։

«Ինչ վերաբերում է դիպուկահարների հետքաշմանը, Մամեդյարովի հայտարարությունը ծիծաղելի եւ ցինիկ է»,- նկատեց փորձագետը։

Ինչպես ասաց Մինասյանը, Ադրբեջանը զրկվել է Հայաստանի եւ Լեռնային Ղարաբաղի վրա ճնշումներ գործադրելու բոլոր լծակները՝ բացի շփման գծում վիճակը սրելուց։ Ադրբեջանի կրած կորուստներից հետո նույնիսկ հետախուզական-դիվերսիոն խմբերն ավելի ուշ են գործում։ «Ադրբեջանը ցածր է գնահատում իր զինվորների կյանքը, չէ՞ որ դիպուկահարների մարտում ավելի շատ ադրբեջանցիներ են զոհվում»,- նկատեց Մինասյանը։

Ադրբեջանական լրատվամիջոցների տվյալներով, այդ երկրի ԱԳ նախարար Էլմար Մամեդյարովը հանդես է եկել ղարաբաղյան հակամարտության կարգավորման վերաբերյալ հայտարարությամբ։ Մասնավորապես, ադրբեջանցի նախարարի վարկածով, «կամ մենք խաղաղ համաձայնագիր ենք կնքում կամ քայլ առ քայլ մոտենում ենք հակամարտության լուծմանը»։ «Առաջին փուլում, իհարկե, հայկական զորքերը պետք է դուրս բերվեն օկուպացված տարածքներից»,- հայտարարել է Մամեդյարովը։

Նա չի շրջանցել նաեւ դիպուկահարների հարցը։ «Հայերն ասում են՝ դուրս բերեք դիպուկահարներին։ Այդ բառերը ծիծաղ են առաջացնում։ Դիպուկահարներն իրենք իրենց չեն եկել, որ նրանց հանենք»,- ասել է նա։