Ֆրանսիայի Հայոց Թեմը բնականոն եւ խաղաղ պայմաններում շարունակում է իր հոգեւոր, մշակութային եւ ազգային արժեքների պահպանման առաքելությունը ֆրանսահայության կյանքում` հակառակ որոշ ուժերի եւ անձերի հարուցած խոչընդոտների, որոնք Թեմի հաստատման առաջին իսկ օրերից շարունակում են ապակայունացնել ֆրանսահայության թեմական դրությունը: Այս մասին ասվում է Ֆրանսիայի հայ առաքելական եկեղեցու հոգեւորականների խորհրդի տարածա հայտարարության մեջ: Դրանում խոսվում է վերջին շրջանում հայաստանյան լրատվամիջոցների հրապարակումներին`Ֆրանսիայի Հայոց Թեմի Նիսի եկեղեցական համայնքում տեղի ունեցած իրադարձությունների վերաբերյալ:
Հայտարարության մեջ ասվում է, որ Nouvelles d`Arménie պարբերականի armenews.com կայքում հրապարակված Նիցայի նախկին ծխական խորհրդի հայտարարությունը, որը թարգմանաբար ներկայացված է նաեւ NEWS.am-ում` «Վիթխարի սկանդալ Հայ Առաքելական Եկեղեցու Ֆրանսիայի Հայոց Թեմում» խորագրով, բացարձակապես չի համապատասխանում իրականությանը: «Հայտարարության մեջ փորձ է արվում Ֆրանսիայի Հայոց Թեմը ներկայացնել «ճգնաժամային եւ տագնապահարույց» իրավիճակում: Այսու հաստատում ենք, որ Ֆրանսիայի Հայոց Թեմը բացարձակապես ճգնաժամային եւ տագնապահարույց իրավիճակում չէ: Հորդորում ենք Նիսի եկեղեցական նախկին վարչության անդամներին դադարեցնել իրենց ավերիչ գործունեությունը եւ հայ հանրությանը ապատեղեկացնելու փոխարեն` նպաստել Նիսի հայ հավատացյալների հավաքական կյանքում հոգեւոր առողջ մթնոլորտի ձեւավորմանը»,-ասված է Ֆրանսիայի հայ առաքելական եկեղեցու հոգեւորականների խորհրդի տարածած հայտարարության մեջ:
