Թուրքիան մեծ արդյունքներ է ակնկալում Կազանում Ռուսաստանի, Հայաստանի եւ Ադրբեջանի նախագահների հանդիպումից: Այդ մասին հայտարարել է Ադրբեջանում Թուրքիայի դեսպան Հուլուսի Քըլըջը:
«Մենք պատրաստ ենք հնարավորինս աջակցել ղարաբաղյան հակամարտության կարգավորմանը: Պաշտոնական Անկարան ցանկանում է, որ Կազանում որոշում կայացվի հակամարտության կարգավորման վերաբերյալ: Մենք երախտագիտություն ենք հայտնում նախագահ Դմիտրի Մեդվեդեւին: Եթե մենք լուծենք այդ խնդիրը, տարածաշրջանում այլ խնդիրները եւս կլուծվեն, հայ-թուրքական սահմանը կբացվի: Դուռը, որ փակվել է առաջինը, առաջինն էլ կբացվի: Մենք պատրաստ ենք անել ամեն ինչ` խնդրի լուծման համար»,- դիվանագետի խոսքն է մեջբերել APA-ն:
Դեսպանը նշել է, թե ղարաբաղյան հակամարտությունը վաղուց պետք է լուծված լիներ, սակայն ձգձգվում է:
Նշենք, որ հունիսին Կազանում կայանալու է Ռուսաստանի, Հայաստանի եւ Ադրբեջանի նախագահների հանդիպումը:
