Կարսի քաղաքապետարանը շարունակում է Էրդողանի կողմից «հրեշավոր» անվանված Մարդկության հուշարձանի քանդման աշխատանքները, միաժամանակ որոշելով՝ քաղաքում տեղադրել Կարսում հայտնի «Քաշար» պանրի արձանը։
Թուրքական Haberturk-ի փոխանցմամբ՝ Կարսի քաղաքապետարանը հաղորդագրություններ էուղարկել Միացյալ նկարիչների եւ քանդակագործների միությանն ու համալսարանների գեղեցիկ արվեստների ֆակուլտետներին՝ հայտնելով, որ պատրաստվում են Կարսում տեղադրել պանրի եւ մեղրի արձաններ։ «Պանրի արձանը կունենա 1,5 մետր բարձրություն եւ 2,1 մետր լայնություն։ Մեղրի արձանի բարձրությունը կլինի 3,3, լայնությունը՝ 1 մետր։
Haberturk-ի հետ զրույցում Կարսի քաղաքապետը նշել է, թե «Քաշար» պանրի եւ մեղրի արձանները կտեղադրեն քաղաքի մուտքի երկու կողմերում։ «Տեսնողները կասեն, որ «Քաշար» պանիրն ու մեղրը Կարսում հայտնի են։ Քաղաքը ներկայացնող սննդամթերքը օգուտ կտա եւ Կարսի արտադրանքի համար նոր շուկաներ կապահովի»,- ասել է Նեվզաթ Բոզքուշը։
Կարսի Մարդկության հուշարձանի հեղինակ, հայտնի քանդակագործ Մեհմեդ Աքսոյը պանրի արձան տեղադրելու հետ կապված հայտարարել է. «Սա պանրային մտածելակերպ է։ Հուշարձանը քանդող մտածողությունն է ցույց տալիս։ Մտածում են, թե արձանը ուտելու-խմելու պես մի բան է»,- ասել է թուրք քանդակագործը։