Ամենայն Հայոց կաթողիկոս Գարեգին Բ-ն պատկերացում չունի, թե Ջավախքում ինչ է կատարվում։ Այս մասին NEWS.am-ի թղթակցի հետ զրույցում նշեց, Վրաստանում գործող, սակայն չգրանցված «Վիրք» կուսակցության նախագահ Դավիթ Ռստակյանը։ Ըստ նրա, կաթողիկոսին ուղեկցող անձինք Հայոց հայրապետին չեն տեղեկացնում իրական վիճակի մասին։
«Հունիսի 14-ին Ախալքալաքում կաթողիկոսի այցի միջոցառումներին անձամբ եմ մասնակցել։ Ներկայումս նա ճաշում է։ Նա շրջապատված է թիկնապահների խմբով, եւ այցի ընթացքում չի շփվել Ջավախքի բնակիչների հետ։ Դրա փոխարեն, նրա ուղեկցորդները գովաբանում եւ շողոքորթ ճառեր են ասում այն մասին, թե որքան լավն ու բարի են Վրաստանի իշխանությունները։ Վրացիները շատ ճկուն օգտագործեցին եկեղեցիների ճանաչման հարցը, ոչ ոք չէր սպասում նման շրջադարձի։ Փոխանակ քննարկվի Վրաստանում Հայոց եկեղեցու ճանաչման հարցը, խոսքը գնաց Հայաստանում Վրաց եկեղեցու ճանաչման մասին, եւ բացի դրանից այժմ խոսում են վրացական եկեղեցական շինությունների ճանաչման մասին։ Կներեք, բայց այդ ի՞նչ վրացական եկեղեցիներ են։ Եթե նկատի ունեն քաղկեդոնական եկեղեցիները, ապա դա չի նշանակում վրացական»,-ասաց Ռստակյանը։
«Վիրք»-ի նախագահը ուշադրություն հրավիրեց այն փաստի վրա, որ այժմ ոչ ոք չի խոսում այն մասին, որ ջավախահայությունը դժգոհ է վրացական իշխանության վարած քաղաքականությունից։ Ռստակյանի կարծիքով՝ նրանք ովքեր կորցնելու ոչինչ չունեն, եւ կարող են կաթողիկոսին իրականության մասին պարզ ասել, պարզապես զրկված են նրան մոտենալու հնարավորությունից։ Նրա խոսքով՝ Ջավախքի «հայկական դպրոց» հասկացությունը վերացել է, ինչը պետք է հայտնել կաթողիկոսին «որ նա իմանա»։
Ռստակյանը հավատացած է, որ Գարեգին Բ-ն այս մասին տեղեկացված չէ։
