Թուրքիայում Դիաբեքիր նահանգի Սիլվանի շրջանում հուլիսի 14-ին քուրդ զինյալների հետ բախման հետեւանքով սպանված 13 թուրք զինվորականների հետ կապված նոր մանրամասներ է ներկայացրել թուրքական Sabah պարբերականը։
Sabah-ը նշում է, թե օրեր առաջ PKK-ի կողմից առեւանգված 2 զինվորականին եւ 1 բուժաշխատողին գտնելու գտնելու համար Դիարբեքիրի նահանգում ժանդարմերիայի զորաջոկատները դուրս էին եկել որոնողական գործողությունների, իսկ քուրդ զինյալների հետ բախումից առաջ 2 օր չեն քնել։
Թուրքական պարբերականի փոխանցմամբ՝ թուրքական զինուժը հուլիսի 14-ին, ժամը 14-ին PKK-ի զինյալների կոդավորված հաղորդագրությունն են բացահայտել, որտեղ նշվել էր. «Այս զինվորները հոգնած են, ինչո՞ւ չեք կրակում»։
«Այս հաղորդագրությունը վերծանելուց հետո լեռնային հատվածում գտնվող թուրք զինվորականներին հրահանգվել է ուշադիր լինել, որից 40 րոպե հետո սկսվել է բախումը։ Քուրդ զինյալները գրոհը սկսել են ավտոմատ հրազեններով, որից հետո մինչեւ 50 մետր մոտեցել են թուրք զինվորականներին եւ սկսել գործի դնել նռնականետերն ու ձեռքի նռնակները։ Նռնակներից սկիզբ առած հրդեհը դժվարացրել է վիրավորների շարժը, որի հետեւանքով մի շարք վիրավորներ այրվել են՝ չկարողանալով դուրս գալ դիրքավորված տեղերից»,-նշում է թուրքական Sabah-ը։