Հայաստանի պաշտպանության նախարարի մամուլի քարտուղար Դավիթ Կարապետյանը մեկնաբանել է մամուլում տարածված այն տեղեկությունը, ըստ որի ՀՀ ԶՈՒ ԳՇ պետ, գեներալ-գնդապետ Յուրի Խաչատուրովը հանդիպումներից մեկի ժամանակ խոսել է ազատագրված տարածքները հանձնելու օգտին:
«Ակնհայտ է, որ դա պարզապես ապատեղեկատվություն է: ՀՀ զինված ուժերի գլխավոր շտաբի պետը զինված ուժերի զինվորական ամենաբարձր պաշտոնատար անձն է եւ իրականացնում է զինված ուժերի կառավարումը: Ղարաբաղյան հարցի կարգավորման շուրջ բանակցությունները ոչ թե զինվորական, այլ քաղաքական իշխանությունների իրավասությունն են: Զինված ուժերի գլխավոր շտաբի լիազորությունները սահմանված են Պաշտպանության մասին ՀՀ օրենքի 14-րդ հոդվածով:
Գեներալ-գնդապետ Յուրի Խաչատուրովը ակտիվորեն մասնակցել է արցախյան պատերազմին եւ քաջ գիտակցում է, թե ինչ զոհողություններով է ձեւավորվել ԼՂՀ անվտանգության գոտին»,- ասել է Դ. Կարապետյանը:
Ավելի վաղ NEWS.am-ը հայտնել էր, որ ըստ մամուլի հրապարակումների, Յուրի Խաչատուրովը նախորդ ամիս Երեւանում զինվորականների հետ մի հավաքի ժամանակ ելույթ է ունեցել ազատագրված հողերը թշնամուն հանձնելու օգտին, դա պատճառաբանելով նրանով, որ հակառակորդն այսօր ուժեղ է: Նրա խոսքերը խիստ դժգոհություն են առաջացրել զինվորականների մեջ: