Իրականությանը չեն համապատասխանում այսօր` սեպտեմբերի 8-ին, մամուլում տարածված լուրերը, թե Հայաստանի տրանսպորտի եւ կապի նախարար Մանուկ Վարդանյանի բնակարանի գազի վարձը հուլիս ամսին կազմել է 800 հազար դրամ: Այս մասին այսօր` սեպտեմբերի 8-ին, NEWS.am-ի թղթակցի հետ զրույցում ասաց նախարարության տեղեկատվության եւ հասարակայնության կապերի բաժնի պետ Պետրոս Դեմիրճյանը:
Նրա խոսքով` նախարարի բնակարանի գազի վարձը կազմել է 14 հազար 140 դրամ, որը վճարել է եւ առկա է անդորագիր: Նա նաեւ հավելեց, որ նախարարի բնակարանի գազի վարձը երբեք չի կազմել 800 հազար դրամ: «Դա նույնիսկ մի ամբողջ տարվա վարձը չէ»,- նշեց բաժնի պետը:
Հիշեցնենք, որ այսօր «Չորրորդ ինքնիշխանություն» թերթը գրել է, որ կապի եւ տրանսպորտի նախարար Մանուկ Վարդանյանի բնակարանի հուլիս ամսվա գազի ծախսը կազմել է 800 հազար դրամ, այսինքն` նախարարի մի քանի ամսվա աշխատավարձի չափով:
«Թե ի՞նչն է պատճառը, որ շոգ հուլիսին նախարարի ընտանիքն այդքան գազ է օգտագործել, դժվար է կռահել: Այնուամենայնիվ փաստն այն է, որ Մանուկ Վարդանյանի ընտանիքը մեկ ամսվա կտրվածքով 800 հազար դրամի գազ է սպառել», - գրել է թերթը:
