Հայաստանը կմասնակցի սեպտեմբերի 27-29-ին Ալեքսանդրիայի (Եգիպտոս) գրադարանում կայանալիք Մերձավոր Արեւելքի երկրների տպագրության ու հրատարակչության պատմությանը նվիրված չորրորդ միջազգային գիտաժողովին:
Միջազգային գիտաժողովին Հայաստանից կմասնակցեն Մաշտոցի անվան հնագույն ձեռագրերի ինստիտուտ-թանգարանի` «Մատենադարանի» տնօրեն Հրաչյա Թամրազյանը, Եղիշե Չարենցի անվան գրականության եւ արվեստի թանգարանի տնօրեն Կարապետ Վարդանյանը, Ազգային գրապալատի հայկական տառատեսակների մշակման եւ պահպանության բաժանմունքի ղեկավար Էդիկ Գաբուզյանը:
Ալեքսանդրիայի գրադարանի տնօրինության առաջարկով այդ օրերին կկայանա հայկական հնագույն գրքերի ցուցահանդես` նվիրված հայատառ առաջին տպագիր գրքի 500-ամյակին: Կներկայացվեն Մատենադարանի ու Չարենցի անվան գրականության եւ արվեստի թանգարանի ցուցադրությունները:
Հիշեցնենք, որ Երեւանը 2012թ-ին ՅՈՒՆԵՍԿՕ-ի կողմից հռչակվել է գրքի համաշխարհային մայրաքաղաք: