Երեւանում ընթացող զորահանդեսին մասնակցում են ոստիկանության եւ Ազգային անվտանգության ծառայության զորքերը:
Առաջինը հրապարակով անցել են Հայաստանի ոստիկանության զորքերի ստորաբաժանումները`` ոստիկանության զորքերի հրամանատար, ոստիկանության պետի տեղակալ, «Մարտական խաչ» 2-րդ աստիճանի շքանշանի ասպետ, գեներալ - լեյտենանտ Գարեգին Գաբրիելյանի հրամանատարությամբ: Ստորաբաժանման մարտիկները պատերազմի տարիներին, բանակի հետ միասին մասնակցել են հանրապետության սահմանների պաշտպանությանը, 252 զինծառայողներ պարգեւատրվել են շքանշաններով ու մեդալներով, գերատեսչական պարգեւներով:
Շքերթը շարունակել են Հայաստանի ԱԱԾ սահմանապահ զորքերի անձնակազմը` ԼՂՀ «Մարտական Խաչ» 1-ին աստիճանի շքանշանի ասպետ, գեներալ-մայոր Արմեն Աբրահամյանի հրամանատարությամբ: Ազգային անվտանգության ծառայության սահմանապահ զորքերի 337 զինծառայողներ գերազանց ծառայության համար պարգեւատրվել են պետական եւ գերատեսչական պարգեւներով:
Այնուհետ հրապարակ է մտել խաղաղարարների ստորաբաժանումը: Այսօր խաղաղապահ բրիգադը լիովին փոխգործունակ է աշխարհի ամենաառաջատար պետությունների զինված ուժերի հետ: 926 խաղաղապահներ անցել են տարբեր առաքելություններով: Բրիգադի 161 զինառայողներ այսօր առաքելություն են իրականացնում Աֆղանստանում եւ Կոսովոյում ՆԱՏՕ-ի կողմից ղեկավարվող գործողություններում: Հայ խաղաղապահները 930 անգամ պարգեւատրվել են օտարերկրյա պետությունների մեդալներով եւ տարբեր խրախուսանքներով:
Հրապարակով անցել են նաեւ պաշտպանության նախարարության ռազմական ոստիկանության ստորաբաժանումները` գնդապետ Յուրի Ղարիբյանի գլխավորությամբ:
